وزیر اعلیٰ سندھ امید کے بجائے موت کا خوف دلا رہے ہیں، فردوس عاشق

وزیراعظم عمران خان کی معاون خصوصی برائے اطلاعات فردوس عاشق اعوان کا کہنا ہے کہ سندھ کے سوا باقی سب نے وزیراعظم کی آواز پر لبیک کہا۔

معاون خصوصی برائے اطلاعات فردوس عاشق اعوان کا کہنا ہے کہ سندھ حکومت کے ترجمان اور وزیر قوم کو تقسیم کرنے کی کوشش کرتے ہیں۔

لاک ڈاؤن ختم نہیں مزید سخت کیا ہے، انسانی جانوں سے کھیلنے نہیں دیں گے، وزیراعلیٰ سندھ

صرف مخصوص شعبوں کو احتیاطی تدابیر کے ساتھ کھولنے کی اجازت دی ہے، چاروں صوبوں میں ٹرانسپورٹ اور اندرونی فضائی آپریشن بند رہے گا: مراد علی شاہ

انہوں نے کہا کہ وزیر اعلیٰ سندھ امید کے بجائے موت کا خوف دلا رہے ہیں، سندھ حکومت اختیارات کے استعمال میں اپنی ذمہ داریاں نہ بھولے۔

خیال رہے کہ کورونا وائرس کی وجہ سے صوبہ سندھ نے سب سے پہلے لاک ڈاؤن کیا تھا تاہم وزیراعظم عمران خان پہلے دن سے لاک ڈاؤن کے خلاف ہیں اور اس معاملے پر وفاق اور سندھ حکومت میں اختلاف رائے ہے۔

گزشتہ روز وزیراعظم عمران خان نے جزوی لاک ڈاؤن 30 اپریل تک بڑھانے کا اعلان کیا تھا تاہم ساتھ ہی تعمیراتی سیکٹر اور دیگر شعبوں کو کھولنے کا بھی اعلان کیا تھا۔

وزیراعظم عمران خان نے لاک ڈاؤن میں مزید 2 ہفتے توسیع کا اعلان کردیا

تعمیراتی صنعت میں رسک فیکٹر بہت کم ہے لہٰذا اسے آج سے کھول رہے ہیں، ابتک ہم ٹھیک چل رہےہیں، کورونا جتنا پھیلنا چاہیے تھا اس کا 30 فیصد پھیلا ہے، وزیراعظم

آج وزیراعلیٰ سندھ مراد علی شاہ نے پریس کانفرنس میں کہا کہ صوبے میں لاک ڈاؤن نرم نہیں مزید سخت کررہے ہیں اور کسی کو انسانی جانوں سے کھیلنے کی اجازت نہیں دیں گے۔

وفاق کا مؤقف ہے کہ لوگوں کو گھروں میں بند نہیں کیا جاسکتا، بھوک اور بے روزگاری کی وجہ سے لوگ مجبور ہوکر سڑکوں پر آئیں گے اور پھر لاک ڈاؤن کا کوئی فائدہ نہیں ہوگا جبکہ سندھ حکومت چاہتی ہے کہ لوگ کچھ دن مکمل لاک ڈاؤن پر عمل کرلیں تاکہ صورتحال جلد از جلد معمول پر آجائے جس پر اب فردوس عاشق اعوان نے وزیراعلیٰ سندھ پر لوگوں میں خوف پھیلانے کا الزام لگادیا ہے۔