06 دسمبر ، 2020 
سندھ کی ثقافت کے دن پر رنگا رنگ تقریبات کا انعقاد
06 دسمبر ، 2020
سندھ کی ثقافت کو اجاگر کرنے کے لیے آج یوم ثقافت منایا گیا، اجرک اور سندھی ٹوپی پہن کر سندھی ثقافت سے محبت کا اظہار کیا گیا۔
سندھ کلچرل ڈےکی مناسبت سے سندھ کی ہزاروں سال قدیم روایات کے امین سندھ واسی روایتی لباس زیب تن کرتے، اجرک اور ٹوپی سجائے سندھ کی رنگا رنگ دھرتی سے اظہار یکجہتی اور نوجوان نسل کو سندھ کی ثقافت سے روشناس کرانے کے لیے نکلتے ہیں۔
سندھ کے یوم ثقافت کے موقع بھر صوبے بھر میں ریلیوں اور تقریبات کا انعقاد کیا گیا، نوجوانوں کی جانب سے سندھی اجرک ٹوپی پہن کر علاقائی دھنوں پر رقص کیا گیا جبکہ ثقافتی رنگوں میں رنگ کر خواتین اور بچے بھی پر جوش نظر آئے۔
کراچی میں بھی پریس کلب کے باہر بڑی ریلی نکالی گئی جس میں شریک نوجوانوں، خواتین اور بچوں نے سندھی ٹوپی اور اجرک پہنی۔
اس کے علاوہ حیدر آباد اور لاڑکانہ سمیت صوبے کے دیگر شہروں اور قصبوں میں بھی روایتی جوش و خروش سے منایا گیا اور ریلیوں میں بڑی تعداد میں عوام نے شرکت کی۔
صوبے کے دیگر شہروں میں ریلیوں کے علاوہ خصوصی پروگرامز بھی منعقد کیے گئے۔
واضح رہے کہ اس دن کو منانے کا آغاز 2009 میں کیا گیا جس کے بعد سے ہر سال دسمبر کے پہلے اتوار کو یہ دن سندھی ثقافت سے یکجہتی کے طور پر منایا جاتا ہے۔
یہ دن گویا ایک ثقافتی جشن ہے جسے لڑکے، لڑکیاں، بچے اور بوڑھے بھرپور جوش و جذبے سے مناتے ہیں۔
