17 دسمبر ، 2020 
کراچی: کورونا کیسز میں اضافہ، ضلع وسطی میں 31 دسمبر تک اسمارٹ لاک ڈاؤن نافذ
17 دسمبر ، 2020
کراچی میں کورونا کی دوسری لہر کے پیش نظر ضلعی انتظامیہ کی جانب سے ایک ضلع میں 31 دسمبر تک اسمارٹ لاک ڈاون جبکہ دیگر اضلاع کے ہارٹ اسپارٹ کی نشاندہی کر دی گئی ہے۔
ڈپٹی کمشنر ضلع وسطی کی جانب سے اسمارٹ لاک ڈاؤن ڈسٹرک ہیلتھ افسر کی سفارشات پر لگایا جا رہا ہے۔
متعلقہ علاقوں میں اسمارٹ لاک ڈاؤن کے تحت صرف میڈیکل اسٹورز، پرچون اور دودھ کی دکانیں کھلی رہیں گی، اسمارٹ لاک ڈاؤن 17 سے 31 دسمبر تک جاری رہے گا۔
اسمارٹ لاک ڈاؤن کے دوران متعلقہ علاقوں میں ڈبل سواری، ریسٹورینٹس پر ٹیک اوے اور ڈیلوری پر پابندی ہو گی جبکہ تجارتی مراکز، پارکس، پبلک ٹرانسپورٹ بھی بند رہے گی۔
اس کے علاوہ ڈسٹرکٹ ایسٹ میں 21 کورونا ہاٹ اسپاٹ کی نشاندہی کی گئی ہے۔
ضلعی انتظامیہ کے مطابق متاثرہ علاقوں کی مجموعی آبادی 27 ہزار سے زائد ہے جہاں کورونا کیسز کی تعداد 446 ہے۔
ڈسٹرکٹ ایسٹ میں سب سے زیادہ 79 کورونا کیسز گلشن اقبال بلاک 6 میں ہیں۔
ڈسٹرکٹ ویسٹ میں کورونا کے 14 ہاٹ اسپاٹ کی نشاندہی کی گئی ہے، متاثرہ علاقوں کی مجموعی آبادی 24371 اور کورونا مریضوں کی تعداد 163 ہے۔
ڈسٹرکٹ کورنگی میں سب سے زیادہ 22 کورونا ہاٹ اسپاٹ کی نشاندہی کی گئی ہے، ڈسٹرکٹ کورنگی کے متاثرہ علاقوں کی مجموعی آبادی 44435 ہے۔
اسی طرح ڈسٹرکٹ ملیر میں کورونا ہاٹ اسپاٹ کی تعداد 13 ہے، ملیر کے متاثرہ علاقوں کی مجموعی آبادی 20928 جبکہ کورونا مریضوں کی تعداد 215 ہے۔
دسٹرکٹ ساؤتھ میں بھی 21 کورونا ہاٹ اسپاٹ کی نشاندہی کی گئی ہے جہاں متاثرہ علاقوں کی آبادی 27081 اور مریضوں کی تعداد 541 ہے۔
