متبادل بندوبست کر لیا، مسافر کوالالمپور سے آج رات روانہ ہوں گے، دفتر خارجہ

ترجمان دفترخارجہ کا کہنا ہے کہ ملائیشیا میں پاکستانی طیارے کو روکے جانے کے معاملے پر ہائی کمیشن متعلقہ حکام سے رابطے میں ہے۔

ترجمان دفتر خارجہ کے مطابق مسافروں کے لیے متبادل بندوبست کر لیا گیا ہے، مسافر کوالالمپور سے آج رات گئے روانہ ہوں گے۔

ملائیشیا میں پی آئی اے کا طیارہ قبضے میں لے لیا گیا، عملہ بھی پھنس گیا

ملائیشیا میں عدالتی حکم پر طیارے کو قبضہ میں لیا جانا ایک ناخوشگوار صورتحال ہے: ترجمان پی آئی اے

خیال رہے کہ پی آئی اے کی پرواز پی کے 895 کراچی سے آج کوالالمپور پہنچی تھی جہاں اسے کوالالمپور ائیر پورٹ پر قبضے میں لے لیا گیا۔

عدالتی حکم پرطیارے کو تحویل میں لینے کی کارروائی مسافروں کے سوار ہونے کے بعد کی گئی، طیارے کولیزکے واجبات ادا نہ کرنے پر تحویل میں لیا گیا۔

ترجمان پی آئی اے کے مطابق معاملہ پی آئی اے اورایک پارٹی کے درمیان برطانوی عدالت میں زیر التواء ہے، طیارہ مقامی عدالت کے یکطرفہ فیصلے پرتحویل میں لیا گیا ہے۔

پی آئی اے حکومتی سطح پر مسئلے کے حل کیلئے کوشاں ہے، پی آئی اے نے 2015 میں بوئنگ 777 طیارہ ویتنام کی کمپنی سے لیز پر حاصل کیا تھا۔