03 مارچ ، 2021
بعض اوقات آپ اپنے قریبی دوستوں اور رشتے داروں کے ساتھ ایک ادارے میں کام کر رہے ہوتے ہیں لیکن آپ کو معلوم ہی نہیں ہوتا کہ آپ کا آپس میں کتنا گہرا تعلق ہے۔
ایسا ہی ایک دلچسپ اور حیران کن واقعہ امریکی ریاست کنیٹکی کٹ میں اس وقت پیش آیا جب کئی سال ایک ساتھ ریسٹورینٹ میں کام کرنے والے دو لڑکیوں کو تقریباً 9 سال بعد پتا چلا کہ وہ دونوں آپس میں سگی بہنیں ہیں۔
کسینڈرا میڈیسن اور جولیا ٹینیٹی پہلی مرتبہ 2013 میں امریکی ریاست کنیٹکی کٹ میں ایک ریسٹورینٹ میں ملیں اور پھر بہت جلد آپس میں اچھی دوست بن گئیں۔
دونوں لڑکیوں کے جسم پر ڈومینکن ری پبلک کے ٹیٹوز بنے ہوئے تھے جس سے دونوں کو لگا کہ ان دونوں کے درمیان کوئی خاص رشتہ ہے۔
لڑکیوں کا کہنا تھا وہ اپنے ٹیٹوز کی وجہ سے یہ سمجھتی تھیں کہ ان کا آپس میں کوئی رشتہ ہے لیکن ایک لڑکی (جولیا) کو اپنانے کے لیے دیے گئے قانونی دستاویزات (Adoption letter) سے یہ حیران کن انکشاف سامنے آیا کہ دونوں لڑکیاں آپس میں سگی بہنیں ہیں۔
پہلے تو کسی کو بھی اس بات پر یقین ہی نہیں آ رہا تھا کہ دونوں آپس میں سگی بہنیں ہیں لیکن جب دونوں کے ڈی این اے کروائے گئے تو اس بات کی تصدیق ہوئی کہ واقعی دونوں آپس میں سگی بہنیں ہیں۔
یہ انکشاف سامنے آنے کے بعد لڑکیوں کے والد نے بھی اعتراف کیا کہ ایک بیٹی کو چھوٹی سی عمر میں پرورش کے لیے کسی کو دے دیا گیا تھا اور لڑکیوں کو یہ بھی پتہ چلا کہ ان کے دیگر سات بہن بھائی بھی ہیں۔