26 مارچ ، 2021 
دعا منگی اغوا کیس: ملزمان کیخلاف اینٹی منی لانڈرنگ کے مقدمات بھی درج
26 مارچ ، 2021
کراچی کے علاقے ڈیفنس میں دعا منگی کے اغوا اور تاوان وصول کرنے کے مقدمے میں ملوث ملزمان کے خلاف اینٹی منی لانڈرنگ کی دفعات کے تحت ایف آئی اے نے بھی مقدمات درج کر لیے ہیں۔
مقدمات ایف آئی اے کارپوریٹ کرائم سرکل نے سندھ پولیس کی تحریری شکایت پر درج کیے ہیں۔
ایف آئی اے ذرائع کے مطابق ملزمان زوہیب علی قریشی، محمد طارق عرف شکیل اور وسیم راجہ عرف کامی کے خلاف الگ الگ مقدمہ درج کیے گئے ہیں۔
ذرائع کے مطابق اغوا کی وارداتوں میں استعمال گاڑیاں اور جائیدادیں بھی مبینہ طور پر تاوان کی رقم سے خریدی گئیں۔
ملزمان سے تاوان کی مد میں وصول کردہ 39 لاکھ 65 ہزار روپے کی رقم بھی برآمد ہوئی، برآمد شدہ رقم، اغوا میں استعمال گاڑیاں، جائیدادیں بھی اے ایم ایل کے تحت پراپرٹیز میں شامل ہیں۔
ملزمان کے نام پر بینک اکاؤنٹس، مزید جائیدادوں اور گاڑیوں کی نشاندہی کے لیے کارروائی جاری ہے۔
ذرائع کا بتانا ہے کہ ملزمان کے خلاف مجموعی طور پر تین مقدمات اینٹی منی لانڈرنگ ایکٹ 2010 کے تحت درج کیے گئے ہیں۔
درخشاں تھانے میں درج اغوا برائے تاوان کے مقدمات میں ملزمان جوڈیشل ریمانڈ پر ہیں۔
