05 جولائی ، 2021 
آصف زرداری کے خلاف پراپرٹی کا ایک اور کیس نکل آیا
05 جولائی ، 2021
سابق صدر آصف زرداری کے خلاف پراپرٹی کا ایک اور کیس نکل آیا۔
جیونیوز کے مطابق قومی احتساب بیورو (نیب) نے نیویارک میں آصف زرداری کے مبینہ اپارٹمنٹ کی تحقیقات شروع کردی ہیں۔
اس حوالے سے نیب کے نوٹس میں کہا گیا ہےکہ مین ہٹن نیویارک میں آپ کا اپارٹمنٹ ہے جو پاکستان میں ظاہرنہیں کیا گیا، بظاہریہ اپارٹمنٹ خریدنے کیلئے پاکستان سے کوئی قانونی رقوم نہیں بھیجی گئی ہیں۔
آصف زرداری نے ضمانت کیلئے رجوع کرلیا
دوسری جانب سابق صدر آصف زرداری نے اس کیس میں ضمانت قبل ازگرفتاری کیلئے اسلام آباد ہائیکورٹ میں درخواست دائر کردی۔
سابق صدر نے درخواست میں مؤقف اپنایا ہے کہ 15 جون کو نیب نے نوٹس بھیجا اور معلومات طلب کیں، جواب دینے کیلئے نیب سے وقت دینے کی استدعا کی کہ معلومات اکٹھی کرسکوں۔
آصف زرداری نے درخواست میں کہا ہےکہ نیب کی جانب سے مجھے نشانہ بنائے جانے کی ایک تاریخ موجود ہے، مختلف بیماریوں میں مبتلا ہوں، اپنے ڈاکٹروں سے علاج کروا رہا ہوں، کیس کے حتمی فیصلے تک ضمانت منظورکی جائے۔
سابق صدر نے استدعا کی ہے کہ نیب کی جانب سے بھیجا گیا نوٹس بھی غیر قانونی قرار دیا جائے۔
