24 اگست ، 2021 
60 روز میں حلف نہ لینے والے رکن پارلیمنٹ کی نشست خالی تصور ہوگی، آرڈیننس منظور
24 اگست ، 2021
وفاقی کابینہ نے سینیٹ اور قومی وصوبائی اسمبلیوں سے حلف لینےکا ٹائم فریم مقررکرنےکے آرڈیننس کی منظوری دے دی ۔
اسلام آباد میں وزیراعظم عمران خان کی زیر صدارت وفاقی کابینہ کا اجلاس ہوا جس میں انتخابی اصلاحات آرڈیننس کی منظوری دی گئی۔
آرڈیننس کے تحت سینیٹ اور قومی و صوبائی اسمبلیوں کے اراکین کو 60 روز میں حلف لینے کا پابند بنایا گیا ہے، 60 روز میں حلف نہ لینے والے رکن کی سیٹ خالی تصور ہوگی۔
وزیراطلاعات فواد چوہدری نے میڈیا بریفنگ میں بتایا کہ ڈاکٹر محمد اشفاق کو ایف بی آرکا نیا چیئرمین تعینات کرنے کی منظوری دی گئی ہے۔
فواد چوہدری کا کہنا تھا کہ افغانستان سے ہزاروں غیر ملکیوں کے انخلا میں پاکستان نے تعاون کیا ہے، بھارت کا افغانستان کے ساتھ کوئی بارڈر نہیں، بھارت افغانستان میں معاملات میں مداخلت سے باز رہے ۔
ان کا کہنا تھا کہ افغانستان میں حکومت بننے سے متعلق پاکستان ذمہ دارانہ کردار ادا کر رہا ہے، امید ہےکہ عالمی برادری بھارتی حرکات کا نوٹس لےگی۔
وزیراطلاعات نے بتایا کہ وزیراعظم نے مینار پاکستان واقعے کو انتہائی تشویش ناک قرار دیا ہے، ایسے واقعات کی روک تھام کے لیے اعلٰی سطح کمیٹی تشکیل دی جا رہی جو حکومت کی رہنمائی کرے گی۔
انہوں نے بتایا کابینہ نے 37 ادویات کی قیمتیں مقرر کرنے اور 12 ادویات کی قیمتوں میں اضافے کی منظوری دی ہے ۔
کابینہ نے ڈاکٹر ندیم ظفر کو ادارہ شماریات کا سربراہ تعینات کرنے اور ڈاکٹر احمد مجتبٰی کو انٹیلیکچوئل پراپرٹی آرگنائزیشن کے چیئرمین کا اضافی چارج دینے کی منظوری بھی دے دی ہے۔
