23 ستمبر ، 2021 
گیس کے بل میں کچرا اٹھانے کا ٹیکس لینے کیلئے رابطہ نہیں کیا گیا: اوگرا
23 ستمبر ، 2021
اسلام آباد: آئل اینڈ گیس ریگولیٹری اتھارٹی (اوگرا) نے سندھ حکومت کی جانب سے گیس کے بلوں کے ذریعے ٹیکس لینے کے معاملے پر لاعلمی کا اظہار کیا ہے۔
ترجمان اوگرا کی جانب سے جاری بیان میں کہا گیا ہےکہ سندھ حکومت کی جانب سے گیس کے بل میں کچرا اٹھانےکا ٹیکس لینے کے لیے رابطہ نہیں کیا گیا ہے، درخواست آئی توہم قانون اور ضابطے کے مطابق دیکھیں گے۔
واضح رہےکہ سالڈ ویسٹ مینجمنٹ بورڈ کے ترجمان کے مطابق کچرا اٹھانے کا ٹیکس سوئی گیس کے بل میں لیا جائے گا اور اس حوالے سے سوئی سدرن کو خط لکھنے کا فیصلہ کیا گیا ہے۔
اس سے قبل حکومت سندھ نے کے الیکٹرک بلوں کے ذریعے کراچی میٹروپولیٹن کارپوریشن (کے ایم سی) کا فائر اورکنزروینسی ٹیکس وصول کرنے کا فیصلہ کیا تھا جس کے لیے سندھ کابینہ نے کے الیکٹرک کے ساتھ ایم او یو سائن کرنے کی ہدایت کردی ہے۔
