29 جنوری ، 2022 
پاکستانی سمندری حدود میں کارروائی، 7 بھارتی ماہی گیر گرفتار، ایک لانچ ضبط
29 جنوری ، 2022
پاکستان میری ٹائم سکیورٹی ایجنسی (پی ایم ایس اے) نے پاکستانی سمندری حدود کی خلاف ورزی اور غیر قانونی طور پر مچھلیاں پکڑنے کے الزام میں بھارت کے 7 ماہی گیروں کو گرفتار کرکے ان کی ایک لانچ کو قبضے میں لے لیا۔
ادارے کے شعبہ تعلقات عامہ کے سربراہ کے مطابق پی ایم ایس اے کے جہاز نے پاکستان کے خصوصی اقتصادی زون میں غیر قانونی شکار میں مصروف بھارتی ماہی گیروں کی لانچ ’تلسی مایا‘ کے خلاف کارروائی کی۔
پاکستان میری ٹائم سکیورٹی ایجنسی کے اہلکار پاکستان کے خصوصی اقتصادی زون میں معمول کے گشت پر تھے تاکہ اپنے ماہی گیروں کے تحفظ کو یقینی بنایا جا سکے جبکہ اس بات کو یقینی بنایا جائے کہ کوئی بھی غیر قانونی ماہی گیر شکار نہ کرے۔
ترجمان کے مطابق پی ایم ایس اے کے جہاز نے پاکستانی حدود کے اندر شکار کرنے والی بھارتی ماہی گیر لانچ کا مشاہدہ کیا اور اس کے 7 رکنی عملے کو خبردار کیا لیکن عملے نے کوئی جواب نہیں دیا اور غیر قانونی شکار جاری رکھا۔
پی ایم ایس اے کے جہاز کے قریب آنے کے بعد ہندوستانی ماہی گیر لانچ کے ناخدا نے جہاز کو مختلف سمتوں میں دوڑایا اور خطرناک حد تک جہاز کے قریب آگیا، اس کے باوجود پی ایم ایس اے کے جہاز نے کامیابی سے کشتی کا پیچھا کرتے ہوئے اسے پکڑ لیا۔
کشتی کو مزید قانونی کارروائی کیلئے کراچی پہنچایا جا رہا ہے کیونکہ یہ پاکستانی قانون اور اقوام متحدہ کے سمندری قانون کے کنونشن کی خلاف ورزی ہے۔
