07 فروری ، 2022 
پشاور میں گوداموں سے پینا ڈول کی گولیوں سے بھرے ہزاروں کارٹن برآمد
07 فروری ، 2022
پشاور کے چارسدہ روڈ پر محکمہ صحت نے چھاپہ مار کر 2 گوداموں سے بخار کی دوا پیناڈول کی گولیوں کے ہزاروں کارٹن برآمد کرلیے۔
محکمہ صحت خیبر پختونخوا کی ٹیم نے بخار کی گولیوں کی قلت کے پیش نظر چارسدہ روڈ پرکارروائی کی اورکارروائی کے دوران گوداموں سے پینا ڈول کی گولیوں سے بھرے 27 ہزار سے زائد کارٹن برآمد کر لیے۔
حکام کا کہنا ہے کہ پیناڈول کی گولیوں کے کارٹن کی قیمت کروڑوں روپے بتائی جا رہی ہے۔
محکمہ صحت کے سینیئر ڈرگ انسپکٹر مہتاب نے جیو نیوز کو بتایا کہ کورونا کی وجہ سے ان گولیوں کا استعمال بڑھ گیا ہے، پیناڈول کی قیمت میں اضافے اور عدم دستیابی کی شکایات مل رہی ہیں۔
ان کا کہنا تھاکہ ضبط کی گئی پیناڈول کی گولیوں کی تعداد اور دیگر تفصیلات جمع کر رہے ہیں جبکہ ذمہ داروں کے خلاف ڈرگ ایکٹ کے تحت کارروائی ہوگی۔
