21 فروری ، 2022 
کلفٹن میں پولیس کا رینجرز کے ہمراہ کومبنگ آپریشن، متعدد افراد زیرحراست
21 فروری ، 2022
کراچی کے علاقے کلفٹن میں پولیس اور رینجرز نے دو کچی آبادیوں میں کومبنگ آپریشن کے دوران متعدد افراد کو حراست میں لے لیا۔
سینیئر سپرنٹنڈنٹ پولیس ساؤتھ رائے اعجاز احمد کے مطابق مختلف خفیہ اطلاعات پر کراچی کے کلفٹن اور بوٹ بیسن تھانوں کی حدود میں رات گئے اچانک کارروائی شروع کی گئی۔
انہوں نے بتایا کہ پولیس نے رینجرز کی بھاری نفری کے ہمراہ کلفٹن کی شاہ رسول کالونی اور نیلم کالونی میں مشترکہ کارروائی کی۔
رینجرز اور پولیس کی بھاری نفری داخلی و خارجی راستوں پر تعینات کی گئی اور کسی کو بھی ان علاقوں میں آنے جانے کی اجازت نہیں تھی۔
رائے اعجاز احمد کے مطابق مشترکہ کارروائی کے دوران گھر گھر تلاشی کا عمل جاری رہا، اس دوران مختلف مقامات اور گھروں میں موجود افراد کے شناختی کارڈ چیک کیے گئے اور بیشتر افراد کا بائیومیٹرک بھی کیا گیا۔
ایس ایس پی ساؤتھ اعجاز احمد کے مطابق آخری اطلاعات تک اس دوران کوئی غیر قانونی عمل تو دیکھنے میں نہیں آیا تاہم مشکوک افراد کو کچھ دیر کے لیے حراست میں رکھا گیا۔
