ڈھاکا … میرپور ڈھاکا میں کھیلے گئے سنسنی خیز میچ میں ڈورنٹو راج شاہی نے ڈھاکہ گلیڈی ایٹرز کو 14 رنز سے شکست دیدی، میچ کی خاص بات پاکستانی فاسٹ بولر محمد سمیع کی شاندار ہیٹ ٹرک تھی۔ ڈورنٹو راج شاہی نے پہلے کھیلتے ہوئے 9 وکٹ پر 144 رنز بنائے ، مارلن سیموئلز 36 رنز بناکر ٹاپ اسکورر رہے ، جنید صدیق نے 25 رنز بنائے۔ الیاس سنی اور ناظم الحسین نے دو، دو کھلاڑیوں کو آوٹ کیا۔ جواب میں ڈھاکہ گلیڈی ایٹرز 130 بناسکی، عمران نذیر کے سوا ان کا کوئی بیٹسمین جم کر نہ کھیل سکا، انہوں نے 54رنز بنائے، محمد سمیع نے ہیٹ ٹرک کرتے ہوئے 3 کھلاڑیوں کو آوٴٹ کیا۔ اس سے قبل کھیلے گئے میچ میں چٹاگانگ کنگز نے باریسال برنرز کو 8 وکٹ سے شکست دیدی ۔ باریسال نے 6 وکٹ پر 125رنز بنائے، بریڈ ہوج نے 38 رنز بنائے۔ کرس گیل 30 رنز بناکر ریٹائرڈ ہرٹ ہوگئے۔ انعام الحق جونیئر اور کیوین کوپر نے دو، دو کھلاڑیوں کو آوٴٹ کیا۔ جواب میں چٹاگانگ نے ناصر جمشید کی جارحانہ بیٹنگ کے بدولت ہدف 2 وکٹ کے نقصان پر حاصل کرلیا، ناصر جمشید نے ناقابل شکست 81رنز بنائے، جوہر الاسلام 41رنز بناسکے۔ لیگ میں آج آرام کا دن ہے۔