19 مارچ ، 2022 
اپوزیشن میں ہمت ہے تو او آئی سی کانفرنس روک کر دکھائیں، شیخ رشید کا ردعمل
19 مارچ ، 2022
اپوزیشن رہنماؤں نے پیر 21 مارچ کو قومی اسمبلی میں وزیراعظم عمران خان کے خلاف تحریک عدم اعتماد پیش نہ کیے جانے کی صورت میں اسمبلی میں دھرنے کی دھمکی دی ہے۔
میڈیا سے گفتگو میں چیئرمین پیپلز پارٹی بلاول بھٹو زرداری نے کہا کہ اگر پیر کو تحریک عدم اعتماد پیش نہ ہوئی تو دیکھتے ہیں آپ اسلامی تعاون تنظیم (او آئی سی) کا وزرائے خارجہ اجلاس کیسے کرتے ہیں، ہم ایوان سے اٹھیں گے نہیں۔
اس موقع پر شہباز شریف نے بھی بلاول کے اعلان کی تائید کی اور ایوان میں دھرنے کا اعلان کیا۔
ان کا کہنا تھاکہ اجلاس بلانا اسپیکرکی ذمہ داری ہے، اگر اسپیکر نے مرحوم رکن اسمبلی کیلئے دعا کے بعد ہاؤس کا بزنس نہ چلایا تو ہم اسمبلی ہال میں دھرنے دینے پر مجبور ہونگے۔
انہوں نے کہا کہ ہم سب پاکستانی ہیں، ہم آپ کو آئین شکنی کی اجازت نہیں دیں گے۔
اس معاملے پر وفاقی وزیر داخلہ شیخ رشید کا ردعمل سامنے آگیا ہے۔ نجی ٹی وی سے گفتگو میں شیخ رشید نے کہا کہ اپوزیشن میں ہمت ہے تو او آئی سی کانفرنس روک کردکھائیں۔
شیخ رشید نے مزید کہا کہ ’بطور وزیر داخلہ کہتاہوں ان کےساتھ وہ ہوگی کہ اپنی نسلوں کو نصیحت کرکےجائیں گے۔‘
خیال رہے کہ 48ویں او آئی سی وزرائے خارجہ کانفرنس اسلام آباد میں 22 اور 23 مارچ کو شیڈول ہے اور اس کا انعقاد قومی اسمبلی میں ہونا ہے۔
