06 اپریل ، 2022 
نگران وزیراعظم کا تقرر: اسپیکر نے عمران اور شہباز سے پارلیمانی کمیٹی کے ارکان کے نام مانگ لیے
06 اپریل ، 2022
اسپیکر قومی اسمبلی اسد قیصر نے عمران خان اور شہباز شریف کو خط لکھ کر نگران وزیر اعظم کی تعیناتی کے لیے پارلیمانی کمیٹی ارکان کے نام طلب کر لیے۔
اسپیکر قومی اسمبلی کی جانب سے وزیراعظم پاکستان اور شہباز شریف کو خطوط ارسال کیےگئے ہیں۔
خطوط میں اسپیکر نے نگران وزیر اعظم کی تعیناتی کے لیے پارلیمانی کمیٹی کے لیے نام طلب کیے ہیں، پارلیمانی کمیٹی کے لیے عمران خان اور شہباز شریف سے چار ، چار ممبران کے نام مانگےگئے ہیں۔
اسپیکر نے یہ خطوط آئین کی شق 224 اے ون کے تحت تفویض اختیارات کے تحت لکھے ہیں۔
خط میں کہا گیا ہےکہ وزیراعظم اور اپوزیشن نگران وزیراعظم کے لیےکسی ایک نام پر اتفاق نہیں کرسکے، خط میں پارلیمانی کمیٹی کے لیے نگران وزیراعظم کی تعیناتی کے لیے وزیراعظم اور شہباز شریف سے دو دو نام بھی مانگےگئے ہیں۔
خط کے متن کے مطابق کمیٹی سبکدوش ہونے والی قومی اسمبلی کے 8 ارکان پر مشتمل ہوگی۔
خیال رہے کہ مسلم لیگ (ن) کے صدر شہباز شریف نے صدر مملکت عارف علوی کے نگران وزیراعظم کے لیے مشاورت کے خط کا جواب دے دیا ہے، خط میں انہوں نے نگران وزیراعظم کے لیے مشاورت سے انکار کردیا ہے۔
