06 جون ، 2022 
کراچی سپرہائی وے پر قربانی کے جانوروں کی منڈی میں پہلی واردات، بیل چوری
06 جون ، 2022
کراچی میں سپرہائی وے پر قربانی کے جانوروں کی مویشی منڈی لگانے کا کام تو ابتدائی مرحلے میں ہے تاہم ایسے میں ساہیوال سے پہنچے بیوپاری کا ایک بیل چوری کرلیا گیا۔
سچل تھانے کے ایس ایچ او اورنگزیب خٹک کے مطابق ساہیوال سے ایک بیوپاری سیف الرحمان گزشتہ روز ہی کراچی مویشی منڈی میں جانور لے کر پہنچا تھا۔
بعد ازاں ایک ملزم موقع پاکر پانی پلانے کے بہانے بچھڑا چوری کر کے لے گیا۔ ملزم نے منڈی کے باہر جانور کو بیمار ظاہر کیا اور اسے ڈاکٹر کو دکھانے کے بہانے گاڑی میں ڈال کر فرار ہوا۔
پولیس کے مطابق ملزم شہزاد نے بچھڑے کو لیاقت آباد میں 70 ہزار روپے میں قصائی کو فروخت کر دیا تھا۔
تاہم مویشی منڈی فعال کرنے میں مصروف انتظامیہ کی شکایت پر سچل پولیس نے کارروائی کی اورنگزیب خٹک کے مطابق واردات میں ملوث دو ملزمان شہزاد علی اور ذیشان کو گرفتار کرکے بچھڑا برآمد کرلیا ۔
