19 اکتوبر ، 2022 
کراچی: گلشن اقبال کے فلیٹ میں آتشزدگی، 5 افراد جھلس گئے
19 اکتوبر ، 2022
کراچی شرقی کے علاقے گلشن اقبال میں ایک فلیٹ میں آگ لگنے سے 5 افراد جھلس گئے۔
فائر بریگیڈ مرکز کے مطابق گلشن اقبال بلاک 11 میں یونیورسٹی روڈ پر سفاری پارک کے قریب واقع رہائشی عمارت نعمان ٹیرس فیز 1 میں تیسری منزل پر واقع ایک فلیٹ میں صبح سویرے آگ بھڑک اٹھی، علاقہ مکینوں کے مطابق اہل محلہ نے اپنے طور پر آگ بجھانے کی بھرپور کوشش کی۔
فائر بریگیڈ حکام کے مطابق واقعے کی اطلاع ملتے ہی صبح 6 بجے فائر فائٹرز اور آگ بجھانے والی ایک گاڑی فوری طور پر روانہ کی گئی۔
گلستان جوہر تھانے کے ایس ایچ او صفدر مشوانی کے مطابق پہلے محلہ اور فائر بریگیڈ کے عملے نے آگ پر قابو پایا۔
ایدھی فاؤنڈیشن کے ترجمان کے مطابق آتشزدگی کے نتیجے میں 50 سالہ طاہر ولد رحمت اللہ، 25 سالہ انکشہ طاہر، 22 سالہ طلحہ طاہر، 21 سالہ حمزہ طاہر اور 30 سالہ مصباح سبحان جھلس گئے جنہیں سول اسپتال کے برنس سینٹر منتقل کیا گیا۔
حکام کا کہنا ہے کہ آگ لگنے کی وجہ فوری طور پر شارٹ سرکٹ بتائی گئی ہے تاہم واقعے کی تحقیقات کی جا رہی ہیں۔
