20 اکتوبر ، 2022 
کراچی غربی اور کورنگی سمیت سندھ کے 5 اضلاع کے ایس ایس پیز کے تبادلے
20 اکتوبر ، 2022
کراچی کے 2 اضلاع غربی اور کورنگی سمیت سندھ کے پانچ اضلاع کے سینیئر سپرنٹنڈنٹ پولیس کی تقرری اور تبادلوں کے احکامات جاری کردیےگئے۔
انسپکٹر جنرل پولیس سندھ غلام نبی میمن کے احکامات پر جاری نوٹیفکیشن کے مطابق سینیئر سپرنٹنڈنٹ پولیس کورنگی کے عہدے سے گریڈ 19 کے سینیئر پولیس افسر فیصل بشیر میمن کا تبادلہ کرکے انہیں کراچی کے ضلع غربی کا پولیس سربراہ تعینات کیا گیا ہے۔
پولیس سروس آف پاکستان گریڈ 18 کے افسر ساجد امیر سدوزئی کا سی ٹی ڈی سے تبادلہ کرکے انہیں سینیئر سپرنٹنڈنٹ کورنگی تعینات کیا گیا ہے۔
اس سے قبل اس عہدے پر سی ٹی ڈی سے ایس پی طارق نواز کو تبادلہ کرکے ایس ایس پی لگایا گیا تھا۔
طارق نواز کو دوبارہ سی ٹی ڈی رپورٹ کرنے کی ہدایت ملی ہے، ایس پی بلدیہ کے عہدے پر تعینات کیپٹن فیضان علی کو تبادلہ کر کے ایس ایس پی شکارپور تعینات کیا گیا ہے۔
ایک اور نوٹیفیکیشن کے مطابق ڈاکٹر عبدالخالق کو ایس ایس پی دادو جب کہ عابد علی بلوچ کو ایس ایس پی تھر پارکر تعینات کرنے کے احکامات جاری کیے گئے ہیں۔
