28 اکتوبر ، 2022 
پاکستان بنگلا دیش انڈر 19 کرکٹ سیریز فیصل آباد سے ملتان منتقل
28 اکتوبر ، 2022
پاکستان اور بنگلا دیش کے درمیان ہونے والی انڈر 19 کرکٹ سیریز فیصل آباد سے ملتان منتقل کردی گئی۔
پاکستان کرکٹ بورڈ( پی سی بی) کے مطابق پاکستان اور بنگلادیش کے درمیان ہونے والی انڈر 19 کرکٹ سیریز کو فیصل آباد سے ملتان منتقل کردیا گیا۔
پی سی بی کا کہنا ہے کہ میچز کی تاریخوں میں تبدیلی نہیں کی گئی، چار روزہ میچ 4 سے 7 نومبر تک کھیلا جائے گا جبکہ تین ون ڈے میچز 10، 12 اور 14 نومبر اور ٹی ٹوئنٹی میچز 16 اور 18 نومبر کو ہوں گے۔
پی سی بی کے مطابق وینیو میں تبدیلی کی وجہ سے قائد اعظم ٹرافی کے تین میچز اب ایل سی سی اے گراؤنڈ لاہور میں کھیلے جائیں گے۔ یہ میچز 2 سے 23 نومبر تک کھیلے جائیں گے۔
دوسری جانب پاکستان بنگلا دیش انڈر 19 کرکٹ سیریز کے میچ آفیشلز کا بھی اعلان کر دیا گیا ہے، سیریز میں راشد ریاض ، شوزب رضا اور ولید یعقوب امپائرنگ کے فرائض انجام دیں گے جبکہ پروفیسر جاوید ملک میچ ریفری ہوں گے۔
