اب کسی ٹیم کے پاکستان نہ آنے کی کوئی وجہ نہیں: چیف ایگزیکٹو کرکٹ آئرلینڈ

چیف ایگزیکٹو کرکٹ آئرلینڈ ویرن ڈیوٹرم کا کہنا ہے اب کوئی وجہ نہیں ہے کہ کوئی ٹیم پاکستان کا دورہ نہ کرے، انٹر نیشنل کرکٹ کی شروعات شاندار ہے اور دو تین برسوں سے کئی ٹیمیں پاکستان کا دورہ کر چکی ہیں۔

جیو نیوز سے خصوصی گفتگو کرتے ہوئے چیف ایگزیکٹو کرکٹ آئر لینڈ ویرن ڈیوٹرم کا کہنا تھا مجھے امید ہے کہ جلد مینز آئرلینڈ ٹیم بھی پاکستان آئے گی، فیوچرٹور پروگرام میں پاکستان نے آئر لینڈ آنا ہے لیکن ابھی ہم پاکستان کے دورے کے لیے آپس میں بات چیت کر رہے ہیں۔

ویرن ڈیوٹرم نے کہا کہ پاکستان کرکٹ بورڈ کے ہمیشہ شکر گزار رہیں گے کیونکہ آئر لینڈ کے فل ممبر بننے کے بعد ہم نے پاکستان ٹیم کو پہلا ٹیسٹ کھیلنے کی دعوت دی، پاکستان کرکٹ بورڈ اور ٹیم نے دعوت قبول کی اور 2018 میں پاکستان ٹیم نے دورہ کیا اور ہم نے پہلا ٹیسٹ کھیلا۔

چیف ایگزیکٹو کرکٹ آئرلینڈ ویرن ڈیوٹرم دائریکٹر ہائی پرفارمنس رچرڈز ہولڈزورتھ کے ساتھ لاہور آئے ہو ئے ہیں جہاں پہلے سے آئر لینڈ ویمن کرکٹ ٹیم موجود ہے جو اب تک دو ون ڈے میچز کھیل چکی ہے۔

ویرن ڈیوٹرم نے کہا کہ پاکستان میں انٹرنیشنل کرکٹ کا ہونا شاندار بات ہے، پاکستان میں کرکٹ کے لیے بہت جذبہ پایا جاتا ہے، لوگ کھیل کے بارے بہت جانتے ہیں، دو تین برسوں سے پاکستان میں تسلسل کے ساتھ کرکٹ ہو رہی ہے، پی ایس ایل میں انٹرنیشنل کرکٹرز آئے، ویسٹ انڈیز، ایم سی سی، آسٹریلیا اور انگلینڈ نے دورہ کیا، اس لیے اب کوئی وجہ نہیں ہے کہ کوئی ٹیم پاکستان کا دورہ نہ کرے۔

چیف ایگزیکٹو کرکٹ آئر لینڈ نے بتایا کہ تین برس پہلے بھی ہم پی سی بی کی دعوت پر پاکستان آئے تھے، چئیرمین کرکٹ آئر لینڈ اورچیف ایگزیکٹو ای سی بی بھی ساتھ تھے، ہم سب نے مختلف وینیوز پر سہولیات کا جائزہ لیا تھا، ہم نے تب کہا تھا کہ واپس آنے کے لیے انتظار نہیں کر سکتے اور اب ہم یہاں ہیں۔

ویرن ڈیوٹرم نے کہا کہ کووڈ کے ختم ہوتے ہی تین برسوں کے بعد ہماری ویمن ٹیم یہاں موجود ہے، آئر لینڈ ویمن کپتان لاورا ڈیلینی کا کہنا ہے کہ یہاں آنے کا تجربہ اچھا لگ رہا ہے اور ان کا بہت اچھا بہت اچھا خیال رکھا جا رہا ہے، پی سی بی ہمارا بھی اچھا خیال رکھ رہا ہے۔