23 دسمبر ، 2022 
کراچی: کچرے کے ٹرک کے ذریعے کروڑوں روپے مالیت کے گٹکے کی اسمگلنگ ناکام
23 دسمبر ، 2022
کراچی میں کسٹمز حکام نے کچرے کے ٹرک کے ذریعے گٹکے کی اسمگلنگ ناکام بنا کر ٹرک کو ضبط کرلیا۔
کسٹم حکام کے مطابق ناظم آباد میں خفیہ اطلاع پر پاکستان کسٹمز کے عملے نے کچرے سے لدے ٹرک کی تلاشی لی جہاں کچرے کے نیچے خفیہ طریقہ سے چھپایا گیا گُٹکا برآمد کیا جس کی مالیت 4 کروڑ روپے ہے۔
دوسری جانب کسٹم حکام نے بلوچستان سے کراچی پہنچنے والی مسافر بس کے خفیہ خانوں سے کروڑوں روپے مالیت کی اسمگل اشیاء برآمد کرلی ہیں۔
کسٹم حکام کی جانب سے بس اور سامان کو تحویل میں لےکر ضبط کرلیا گیا جن میں آئی فونز، اسمارٹ فونز، ٹیبلیٹس، سلائی مشینیں، ایرانی کوکنگ آئل اور غیرملکی سگریٹس شامل ہیں۔
دونوں کارروائیوں میں ملوث افراد کے خلاف کسٹمز ایکٹ کے تحت مقدمات درج کرکے قانونی کارروائی شروع کردی ہے۔
