11 جنوری ، 2023 
مونس کی اہلیہ نے بیرون ملک جانے سے روکنے کی لسٹ میں نام ڈالنے کا اقدام چیلنج کردیا
11 جنوری ، 2023
وزیراعلیٰ پرویز الٰہی کے بیٹے و سابق وفاقی وزیر مونس الٰہی کی اہلیہ تحریم الٰہی نے بیرون ملک جانے سے روکنے کی لسٹ میں نام ڈالنے کا اقدام لاہور ہائیکورٹ میں چیلنج کردیا۔
مونس الٰہی کی اہلیہ کی جانب سے درخواست میں مؤقف اختیار کیا گیا ہے کہ 4 بچوں کے ساتھ برطانیہ میں مقیم ہوں، 3 نابالغ بچے برطانیہ میں موجود ہیں، موسم سرما کی تعطیلات پر بچوں کے ساتھ پاکستان آئی تھی، منی لانڈرنگ کے الزام پر 5 جنوری کو ایف آئی اے کی جانب سے طلبی کا نوٹس ملا، وقت کی کمی کی وجہ سے 6 جنوری تک جواب نہیں دے سکی۔
انہوں نے کہاکہ منی لانڈرنگ سے متعلق غیر مصدقہ الزامات میڈیا پر چلوائے گئے، خاوند اورسسر کے پاکستان تحریک انصاف کو دھوکا دینے سے انکار پر انتقامی کارروائی کی جارہی ہے، بدنیتی کا مظاہرہ کرتے ہوئے نام پرویژنل نیشنل آئیڈینٹیفکیشن (پی این آئی) لسٹ میں ڈالا گیا ہے لہٰذا بیرون ملک سفر کرنے کی اجازت دی جائے۔
دوسری جانب وفاقی تحقیقاتی ایجنسی (ایف آئی اے) نے وزیراعلیٰ پنجاب پرویزالٰہی کے بیٹے راسخ الٰہی، ان کی اہلیہ اور مونس الٰہی کی اہلیہ سمیت 9 افراد کے نام پرویژنل نیشنل آئیڈنٹیفکیشن لسٹ (پی این آئی ایل) پر ڈال دیے، ان افراد کے ایک ماہ تک ملک سے باہر جانے پر پابندی عائد کر دی گئی ہے۔
