14 جنوری ، 2023 
کراچی میں بلدیاتی الیکشن کے سکیورٹی انتظامات، ایسٹ پولیس کا فلیگ مارچ
14 جنوری ، 2023
کراچی میں بلدیاتی انتخابات کی سکیورٹی کے سلسلے میں کراچی پولیس ضلع شرقی کی جانب سے فلیگ مارچ کیا گیا جس میں تمام تھانوں سے پولیس افسران اور نفری شریک ہوئی۔
سینیئر سپرنٹنڈنٹ پولیس (ایس ایس پی) ایسٹ سید عبدالرحیم شیرازی کی قیادت میں پولیس نفری کو جناح گراؤنڈ میں لائن اپ کیا گیا جس کے بعد ایس پی جمشید کوارٹر اور ایس پی گلشن اقبال سمیت تمام تھانوں کی پولیس موبائل اور عملہ فلیگ مارچ پر روانہ ہوا۔
ایس ایس پی ایسٹ عبدالرحیم شیرازی کی قیادت میں فلیگ مارچ نمائش چورنگی سگنل سے شروع ہو کر تاج کمپلیکس، پریڈی اسٹریٹ، پیپلز چورنگی، بنوری ٹاؤن، جمشید روڈ، سینٹرل جیل گیٹ، جیل برج، شہید ملت روڈ اور شاہراہ فیصل سمیت مختلف علاقوں سے ہوتا ہوا ال آصف اسکوائر پر اختتام پذیر ہوا۔
فلیگ مارچ کے دوران پولیس موبائلوں سے ہوٹر بجائے جاتے رہے، ایس ایس پی ایسٹ عبدالرحیم شیرازی کے مطابق فلیگ مارچ کا مقصد شہریوں کو پولیس سکیورٹی اور تحفظ کا احساس دلانا تھا۔
