14 جنوری ، 2023 
پاکستان
کراچی میں ڈائپر شاپ سے ایک ملزم بچوں کے ڈائپر کا بورا لے کر فرار ہوگیا: پولیس — فوٹو: فائل
کراچی میں چوری کی انوکھی واردات چور بچوں کے ڈائپر چرا کر فرار ہوگیا
14 جنوری ، 2023
کراچی میں اسٹریٹ کرمنلز اور مسلح ملزمان کی جانب سے مختلف نوعیت کی انوکھی وارداتیں سامنے آرہی ہیں۔
پولیس ذرائع کے مطابق کراچی سینٹرل کے فیڈرل بی ایریا بلاک 9 دستگیر کے علاقے میں ایک دلچسپ واردات رپورٹ ہوئی ہے جہاں ڈائپر شاپ سے ایک ملزم بچوں کے ڈائپر کا بورا لے کر فرار ہوگیا۔
پولیس ذرائع کے مطابق دکاندار کا کہنا ہے کہ ایک موٹر سائیکل سوار ملزم ڈائپر شاپ پر گاہک بن کر آیا اور دکان کے باہر کھڑے ہو کر واردات کا موقع ملنے کا منتظر رہا، جیسے ہی دکاندار دوسرے گاہک کو سامان دینے میں مصروف ہوا تو موٹر سائیکل سوار دکان کے باہر رکھا ہوا ڈائپر کا بورا اٹھا کر بھاگ گیا۔
پولیس ذرائع کے مطابق رپورٹ درج کرکے ملزم کی تلاش شروع کردی گئی ہے۔
