12 فروری ، 2023
قومی کرکٹر اور لاہور قلندرز کے فخرزمان نے کہا ہے کہ پی ایس ایل کی بہت اچھی تیاری کی ہے کیمپ میں انجوائے کر کے ٹریننگ کی ہے، امید ہے اچھے مومنٹم کے ساتھ پی ایس ایل کا آغاز کریں گے۔
جیو نیوز سے خصوصی گفتگو کرتے ہوئے لاہور قلندرز کے فخر زمان نےکہا کہ شاہین آفریدی اور حارث رؤف نے لاہور قلندرز کو بہت میچز جتوائے ہیں، دونوں کھلاڑی پی ایس ایل 8 میں بھی اپنی کارکردگی کو دہرائیں گے، ہماری بولنگ اچھی ہے شاہین آفریدی اور حارث رؤف جان مارتے ہیں جس کا ٹیم کو فائدہ ہوتا ہے۔
انہوں نے بتایا کہ انجری سے واپسی پر پلان کے مطابق تیاری کی ہے، میں نے لمبے سیشنز کرنے کی کوشش کی ہے، کیمپ میں جو چاہیے تھا حاصل کیا، امید ہے جو محنت کی ہے اس کی وجہ سے پرفارمنس بھی بہتر ہوگی۔
فخرزمان کا کہنا تھا کہ ملتان میں اوس کا زیادہ مسئلہ نہیں ہو گا، وہاں کھیلنے کا سب کو تجربہ ہے ،کنڈیشنز سے مقامی کھلاڑی واقف ہیں کوئی مشکل نہیں ہو گی۔
ایک سوال کے جواب میں فخرزمان کا کہنا تھا کہ شاہین آفریدی نے محمد رضوان سمیت ٹاپ آرڈرز کیلئے حکمت عملی تیار کی ہو گی، محمد رضوان کی اسٹرینتھ کا سب کو علم ہے، گزشتہ سیزن میں بھی پلان کیا اب بھی کریں گے۔