18 فروری ، 2023 
کراچی پولیس پر حملہ بھارتی ایجنسی را کی کارروائیوں کا شاخسانہ لگتا ہے، گورنر سندھ
18 فروری ، 2023
گورنرسندھ کامران ٹیسوری کا کہنا ہے کہ کراچی پولیس پرحملہ بھارتی ایجنسی را کی کارروائیوں کا شاخسانہ لگتا ہے۔
جمعہ کی شام کو کراچی کے علاقے شارع فیصل پر واقع کراچی پولیس آفس (کے پی او) پر دہشتگروں کے حملے میں دو پولیس اہلکاروں اور رینجرز اہلکار سمیت 4 افراد شہید ہوگئے جبکہ پولیس اور قانون نافذ کرنے والے اداروں کی جوابی کارروائی میں 3 دہشتگرد مارے گئے اور عمارت کو تقریباً 4 گھنٹے بعد کلیئر کرالیا گیا۔
پولیس حکام کے مطابق 18 زخمیوں کو اسپتال منتقل کر دیا گیا۔
واقعہ کے بعد گورنرسندھ کامران ٹیسوری نے جیو نیوز سے بات چیت کرتے ہوئے کہا کہ کراچی پولیس پرحملہ بھارتی ایجنسی را کی کارروائیوں کا شاخسانہ لگتا ہے۔ اس قسم کے حملوں سے ہمارے حوصلے پست نہیں ہوں گے۔
ان کا کہنا تھا کہ بزدلانہ کارروائیوں کا پہلے بھی مقابلہ کرتے رہے ہیں، اب بھی پرعزم ہیں،بعد ازاں گورنر سندھ کامران ٹیسوی نے جناح اسپتال کراچی کا دورہ کرتے ہوئے حملے کے زخمیوں کی عیادت کی اور زخمی رینجرز اور پولیس اہلکاروں کے علاج معالجہ کے بارے میں دریافت کیا۔
گورنر سندھ نے اہلکاروں سے کہا کہ آپ نے شہر کا امن برقرار رکھنے کے لیے انتہائی جرات کا مظاہرہ کیا۔
انہوں نے کہا کہ 20 سال سے را کی فنڈنگ اس شہر میں کی گئی تاکہ ملک تباہ ہو، سلام پیش کرتا ہوں آئی جی سندھ کو جن کی کاوشوں سے یہ حملہ ناکام ہوا۔
