01 مارچ ، 2023 
کراچی: سی ٹی ڈی نے دہشتگردی کی منصوبہ بندی ناکام بنادی، 2 ملزمان گرفتار
01 مارچ ، 2023
کراچی: کاؤنٹر ٹیررازم ڈیپارٹمنٹ(سی ٹی ڈی ) نے پاپوش نگر میں کارروائی کے دوران 2 ملزمان کو گرفتار کرکے بھاری اسلحہ اور گولہ بارود برآمد کر لیا۔
سی ٹی ڈی حکام کے مطابق ناظم آباد پاپوش نگر میں کارروائی کے دوران 2 ملزمان فہد بلوچ اور ظاہر بلوچ کو گرفتار کیا گیا جن کے قبضے سے ایک کلاشنکوف، 17 نائن ایم ایم پستول اور دیگر مختلف قسم کی 6500 گولیاں اور نائن ایم ایم پستول کے 34 میگزین برآمد ہوئے۔
سی ٹی ڈی حکام نے بتایا انہیں اطلاع ملی تھی کہ مذکورہ ملزمان اسلحہ کی بڑی کھیپ کراچی میں دہشتگردی کی منصوبہ بندی کے پیش نظر کسی مقام پر منتقل کرنا چاہتے ہیں۔
حکام کے مطابق ملزم ظاہر بلوچ اس سے قبل بھی متعدد بار گرفتار ہوچکا ہے، کئی بار جیل گیا اور عادی جرائم پیشہ ہے، ملزمان کے خلاف سی ٹی ڈی تھانے میں مقدمہ درج کر لیا گیا ہے۔
