14 مارچ ، 2023 
کراچی کے مختلف علاقوں میں تحریک انصاف کے کارکنوں کا احتجاج
14 مارچ ، 2023
لاہور میں تحریک انصاف کے چیئرمین عمران خان کی گرفتاری کیلئے اسلام آباد پولیس کی ٹیم موجود ہے اور زمان پارک کے باہر پولیس کو کارکنوں کی جانب سے مزاحمت کا سامنا ہے۔
اسی تناظر میں تحریک انصاف کے کارکنوں نے کراچی شہر کے مختلف مقامات پر بھی احتجاج شروع کردیا ہے۔
کراچی کے علاقوں لانڈھی، داؤد چورنگی، مرزا آدم خان روڈ پر آئی سی آئی برج کے قریب احتجاج جاری ہے۔
اس کے علاوہ فور کے چورنگی، فائیو اسٹار چورنگی، شاہین کمپلیکس، اورنگی بنارس چوک ، نمائش چورنگی پر بھی احتجاج کیا جا رہا ہے۔
پی ٹی آئی کے کارکنوں نے قائد آباد میں نیشنل ہائی وے پر دھرنا دے دیا ہے۔ ملیر کے علاقے مرغی خانہ اسٹاپ پر ہنگامہ آرائی اور جلاؤ گھیراؤ کیا گیا جس کی وجہ سے اسٹیل ٹاؤن، گلشن حدید، ٹھٹھہ اور بدین جانے والا ٹریفک معطل ہوگیا ہے۔
