04 اپریل ، 2023 
کراچی: آن لائن رائیڈر کو مہرہ بنا کر ملزمان ریسٹورنٹ سے 27 ہزار روپے کا کھانا لے اُڑے
04 اپریل ، 2023
کراچی میں دو نامعلوم ملزمان آن لائن رائیڈر کو مہرہ بناکر گورا قبرستان کے قریب ریسٹورنٹ سے 27 ہزار روپے مالیت کا کھانا لے کر رفو چکر ہوگئے۔
گورا قبرستان کے قریب واقع فوڈ مارکیٹ کے جدید ریسٹورنٹ ریسٹو کراچی پر پیر کی شب دو افراد آئے جنہوں نے بوفے میں 5 ہزار روپے کا کھانا کھایا اور ساتھ میں لائے ہوئے آن لائن رائیڈر کو بھی اپنی طرف سے کھانا کھلایا، اس دوران انہوں نے 22 ہزار روپے کا کھانا پارسل کرنے کا بھی آرڈر دیا۔
ریسٹورنٹ مالک سید مدثر زیدی کے مطابق بھرپور طریقے سے کھانا انجوائے کرنے اور کھانا ساتھ لے کر ان افراد نے اپنے ساتھ آئے رائیڈر کو ریسٹورنٹ میں یہ کہہ کر بیٹھایاکہ وہ نیچے سے رقم لے کر آرہے ہیں، جس کے بعد وہ رفو چکر ہوگئے۔
ملزمان جاتے ہوئے رائیڈر کا موبائل فون بھی ساتھ لے گئے، تاہم کچھ دیر بعد جب وہ واپس نہ آئے تو رائیڈر اور ریسٹورنٹ منیجر کو تشویش ہوئی جس پر انہوں نے رائیڈر سے باز پرس کی تو اس نے بتایا کہ وہ رقم لینے گئے ہیں، انہوں نے اسے بھی کرائے کی ادائیگی کرنی ہے۔
مزید ایک گھنٹہ انتظار کرنے کے بعد وہ نہیں آئے تو ریسٹورنٹ انتظامیہ نے پولیس طلب کر لی۔
صدر پولیس کے مطابق تفتیش کے دوران رائیڈر شفیق اللہ بے گناہ ثابت ہوا ہے۔
شفیق اللہ کا کہنا ہے کہ ملزمان کورنگی میں چنیوٹ اسپتال سے رائیڈ پر ساتھ لائے تھے اور اسے لالچ دیا کہ کھانا کھانے کے بعد وہ اسے واپس چنیوٹ اسپتال کورنگی لے جائیں گے مگر وہ اس کے ساتھ ساتھ ریسٹورنٹ والوں کو بھی چونا لگا گئے۔
