27 جون ، 2023 
بلوچستان میں ایران سے پیٹرول اور خوردنی اشیا کی اسمگلنگ سب سے بڑا کاروبار بن گیا
27 جون ، 2023
بلوچستان میں سرکاری ملازمتوں کے مواقع نہ ہونے اور انڈسٹریز کی عدم دستیابی کے باعث ایران سے پیٹرول اور خوردنی اشیا کی اسمگلنگ سب سے بڑا کاروبار بن گیا۔
جان ہتھیلی پر رکھ کر ہزاروں نوجوان مکران کے سرحدی علاقوں سے ایرانی تیل اور خوردنی اشیا نہ صرف بلوچستان بلکہ ملک بھر میں پہنچاتے ہیں۔
صوبائی وزیر زراعت میر اسد بلوچ کا کہنا ہے کہ بلوچستان کی دو کروڑ دس لاکھ کی آبادی ہے ،لوگوں کے گھر اور چولہے اسی تیل سے جلتے ہیں، اگر یہ نہ ہوتا تو بھوک ہوتی ،افلاس ہوتی ،غربت ہوتی۔
ان کے الفاظ سے صوبے میں بے روزگاری کی سنگینی کا اندازہ کیا جاسکتا ہے ۔
اس صورتحال سے سب زیادہ متاثر مکران کے نوجوان ہیں ، صنعتیں نہ ہونے اور ملازمتوں کے مواقع کم ہونے سے ہزاروں نوجوان ایرانی تیل ،کوکنگ آئل اور خوردنی اشیاء کی اسمگلنگ کے کارروبار سے منسلک ہیں۔
ایرانی سرحد سے پہاڑوں میں جان جوکھم میں ڈال کر پیٹرول اور دیگر اشیاء مکران اور رخشان لاتے ہیں جہاں سے یہ سب ملک کے مختلف علاقوں تک پہنچائی جاتی ہیں۔
