27 جون ، 2025 
واشنگٹن: وفاقی وزیر احد چیمہ کی عالمی بینک کی قیادت سے اہم ملاقات
27 جون ، 2025
وفاقی وزیر برائے اقتصادی امور احد خان چیمہ نے امریکا کے سرکاری دورے کے دوران عالمی بینک کی اعلیٰ قیادت سے واشنگٹن میں اہم ملاقاتیں کی ہیں۔
وفاقی وزیر نے عالمی بینک کی مینیجنگ ڈائریکٹر برائے آپریشنز آنا بیئر ڈے اور جنوبی ایشیا کے نائب صدر مارٹن رائزر سے تفصیلی ملاقات کی۔
احمد چیمہ نے گزشتہ برس کے دوران پاکستان اور عالمی بینک گروپ کے درمیان مضبوط ہوتے ہوئے تعاون کی تعریف کی، جس کا نتیجہ "کنٹری پارٹنرشپ فریم ورک کی صورت میں سامنے آیا ہے۔یہ 10 سالہ حکمت عملی ہے جس کے تحت عالمی بینک کی جانب سے 40 ارب امریکی ڈالر کی تاریخی معاونت فراہم کی جائے گی۔
وفاقی وزیر نے عالمی بینک کے ایگزیکٹو ڈائریکٹر عبد الحق بجاوی سے بھی ملاقات کی اور تجویز دی کہ ایگزیکٹو ڈائریکٹرز کو رکن ممالک کے باقاعدہ دورے کرنے چاہئیں تاکہ ان کی ترقیاتی ضروریات اور ممکنہ شراکت داریوں کو بہتر انداز میں سمجھا جا سکے۔
ان ملاقاتوں میں حالیہ عالمی بینک کی منظوریوں پر بھی تبادلہ خیال ہوا، جن میں 700 ملین ڈالر کا ریکو ڈک مائننگ منصوبہ اور 400 ملین ڈالر کا رسک پارٹیسپیشن فسیلٹی شامل ہیں، جو بعض اعتراضات کے باوجود آگے بڑھے ہیں۔
وفاقی وزیر احد خان چیمہ نے کہا کہ بطور پاکستان کے سب سے بڑے ترقیاتی شراکت دار، عالمی بنک نے ہماری معاشی و سماجی ترقی اور عوام کی فلاح و بہبود میں کلیدی کردار ادا کیا ہے۔
