21 جولائی ، 2023 
کرونا رتنے نے سری لنکن ٹیسٹ ٹیم کی کپتانی چھوڑنے کی درخواست دیدی
21 جولائی ، 2023
سری لنکا کی ٹیسٹ ٹیم کےکپتان دیموتھ کرونا رتنے نے کپتانی چھوڑنے کا عندیہ دے دیا۔
غیر ملکی میڈیا کے مطابق دیموتھ کرونا رتنے نے کپتانی چھوڑنے کے لیے سری لنکن کرکٹ بورڈ کی سیلکشن کمیٹی کو دوبارہ درخواست دے دی ہے۔
دیموتھ کرونا رتنے نے اپنی درخواست میں کہا ہے کہ میں کرکٹ ٹیم کی مزید کپتانی نہیں کرنا چاہتا، میں نے پہلے بھی کپتانی چھوڑنے کی درخواست کی تھی مگر بورڈ نے کپتانی جاری رکھنے کا کہا۔
سری لنکن ٹیم کے کپتان نے پاکستان کے خلاف سیریز کے بعد کپتانی سے دستبرداری کی درخواست بورڈ کو دے دی ہے اور کہا ہے کہ میں اپنا مکمل فوکس اپنی بیٹنگ پر کرنا چاہتا ہوں۔
پاکستان اور سری لنکا کے درمیان دو ٹیسٹ میچوں کی سیریز کا پہلا ٹیسٹ گال میں کھیلا گیا جس میں پاکستان نے سری لنکا کو 4 وکٹوں سے شکست دی تھی۔
دیموتھ کرونا رتنے کا کہنا ہے کہ اپنی بیٹنگ سے ٹیم کو جب تک ہو سکا سپورٹ کروں گا، ٹیم میں کئی ایسے کھلاڑی ہیں جو کپتان کے عہدے کے لیے موزوں ہیں مگر کپتان بنانے کا فیصلہ میرا نہیں سلیکشن کمیٹی کا ہو گا۔
انہوں نے کہا کہ ہماری اگلی سیریز فروری میں ہے اس لیے نئے کپتان کے بارے میں سوچنےکا ابھی بڑا وقت ہے، کرونا رتنے نے اس سے پہلے آئرلینڈ کے خلاف سیریز کے بعد کپتانی چھوڑنے کی درخواست کی تھی۔
خیال رہے کہ دیموتھ کرونا رتنے نے 29 ٹیسٹ میچز میں سری لنکن ٹیم کی کپتانی کی ہے۔
مزید خبریں :
بھارت پاکستان میں ہونیوالے بلائنڈ ٹی ٹوئنٹی ورلڈ کپ سے دستبردار
19 نومبر ، 2024
