انجو اب بھی میری بیوی ہے وہ کسی اور سے شادی نہیں کر سکتی: بھارتی لڑکی کے شوہر کا دعویٰ

بھارت سے دیر بالا پہنچی انجو کے بھارتی شوہر اروند کمار کا دعویٰ ہے کہ انھوں نے ابھی تک انجو کو طلاق نہیں دی ، قانونی طور پر انجو اب بھی ان کی بیوی ہیں لہٰذا وہ کسی سے شادی نہیں کر سکتی۔

بھارت سے آئی خاتون انجو نے دیر بالا میں پاکستانی نوجوان نصر اللہ سے نکاح کر لیا ہے، مالاکنڈ ڈویژن کے ڈی آئی جی ناصر محمود ستی نے انجو اور نصراللہ کے نکاح کی تصدیق کرتے ہوئے بتایا تھا کہ بھارتی خاتون نے اسلام قبول کر کے اپنا نام فاطمہ رکھ لیا ہے۔

کبھی  نہیں سوچا تھا کہ انجو ایسا کوئی قدم اٹھائے گی : اروند 

بھارتی صحافیوں سے کی گئی گفتگو میں اروند کمار کا کہنا تھا کہ انجو نے 3 سال قبل نئی دلی میں طلاق کے کاغذات جمع کرائے تھے لیکن ان کاغذات کے حوالے سے مجھے ابھی تک عدالت سے کوئی نوٹس موصول نہیں ہوا، کاغذات پر انجو اب بھی میری بیوی ہے، وہ کسی اور سے شادی نہیں کر سکتی، حکومت کو اس معاملے کی تحقیقات کرنی چاہیے۔

اروند کمار کا کہنا حکومت کو انجو کے پاسپورٹ اور ویزا دستاویزات کی تحقیقات بھی کرنی چاہیے تاکہ یہ معلوم ہو سکے آیا انجو نے کہیں پاکستان کا سفر کرنے کے لیے جعلی دستاویزات اور دستخط تو استعمال نہیں کیے۔

اروند کمار نے انجو کے بھارت واپس آنے پر ایف آئی آر درج کروانے سے متعلق ارادہ ظاہر کرتے ہوئے کہا کہ انجو نے مجھے ویزا بننے کے عمل سے متعلق بھی مطلع نہیں کیا تھا، انجو کے بھارت پہنچنے پر  اس کے خلاف مقدمہ درج کراؤں گا۔

انجو کے بھارتی شوہر کے مطابق ان کی بیٹیوں نے انجو کو ماں ماننے سے انکار کر دیا ہے، ایسی صورتحال میں بچوں کو سنبھالنا ان کے لیے مشکل ہے، اروند نے یہ بھی بتایا کہ انجو کی ذہنی حالت ٹھیک نہیں تھی، وہ کام کے دوران الجھی رہتی تھی لیکن انھوں نے یہ نہیں سوچا تھا کہ انجو ایسا کوئی قدم  اٹھائے گی۔