ویڈیو: لاہور میں پارکنگ ملازم پر بہیمانہ تشدد کا ایک اور واقعہ

لاہور کے علاقے ڈیفنس بی میں پارکنگ ملازم پر بہیمانہ تشدد کے ایک اور  واقعے کی ویڈیو سامنے آگئی۔

ویڈیو میں پارکنگ کمپنی کےملازم پر تین سے چار  افراد کو تشددکرتے دیکھا جاسکتا ہے۔

ایس ڈی پی او ڈیفنس اویس شفیق کے مطابق ڈیفنس بی میں پارکنگ ملازم محمد ایوب نے ایک نوجوان کو گاڑی غلط پارک کرنے سے روکا توملزم طیش میں آگیا، اس نے پہلے خود پارکنگ ملازم کو مارنے کی کوشش کی جب وہ کامیاب نہ ہو سکا تو اس نے فون کرکے اپنے گارڈز کوبلالیا۔

لاہور:گارڈ نے روکنے کی جرات کیسےکی؟ ڈبل کیبن گاڑی میں سوار مسلح افراد کا معمر گارڈ پر تشدد

لاہورکے ڈیفنس کمرشل ایریا میں سکیورٹی گارڈ پر تشدد کے واقعہ کا مقدمہ تھانہ ڈیفنس سی میں درج کر لیا گیا ہے۔

اویس شفیق کے مطابق ملزمان نے پارکنگ ملازم کو تشدد کا نشانہ بنایا، پولیس نے پارکنگ ملازم محمد ایوب کی مدعیت میں مقدمہ درج کر لیا ہے اور سی سی ٹی وی ویڈیوز اور دیگر ذرائع کی مدد سےان کی تلاش شروع کر دی ہے۔

یاد رہےکہ 3 دن پہلے بھی لاہورکے ڈیفنس کمرشل ایریا میں 5 افراد نے انٹری گیٹ پر گاڑی روکنے پر معمر سکیورٹی گارڈ عباس علی کو تشدد کا نشانہ بنایا تھا، اس واقعے کی بھی ویڈیو منظر عام پر آئی تھی اور مقدمہ درج ہونےکے باوجود اب تک ملزمان قانون کی گرفت میں نہ آسکے۔