19 اگست ، 2023 
سیالکوٹ سے جدہ کیلئے ائیر سیال کی پہلی پرواز، قونصل جنرل امارات نے افتتاح کر دیا
19 اگست ، 2023
متحدہ عرب امارات کے قونصل جنرل کراچی پروفیسر بخیت عتیق الرومیثی نے سیالکوٹ ائیر پورٹ پر سیالکوٹ کی بزنس کمیونٹی کے زیراہتمام چلنے والی انٹرنیشنل فضائی کمپنی ائیر سیال کی سیالکوٹ سے جدہ کیلئے نئی فلائٹ کا افتتاح کردیا۔
سیالکوٹ سمیت دیگر اضلاع سے بزنس کمیونٹی کی بڑی تعداد اور ائیر سیال کے بورڈ آف ڈائریکٹرز کے ممبران بھی موجود تھے۔ پروفیسر بخیت عتیق الرومیثی نے کیک کاٹ کر فلائٹ کا باقاعدہ افتتاح کیا۔
اس موقع پر یو اے ای قونصل جنرل نے کہا کہ ائیر سیال ایک بین الاقوامی معیار کی فضائی کمپنی ہے جس نے اپنی اعلیٰ اور معیاری سروس سے بہت کم عرصہ میں اپنا ایک الگ مقام بنا لیا ہے۔
انہوں نے ائیر سیال کی پوری منیجمنٹ اور ڈائریکٹرز کو نئی انٹرنیشنل فلائٹ کے آغاز پر مبارکباد پیش کی اور کہا کہ سیالکوٹ کی بزنس کمیونٹی نے اپنی مدد آپ کےتحت پہلے انٹرنیشنل ائیرپورٹ اور اب فضائی کمپنی بنا کر خود کو دنیا میں ممتاز ثابت کیا ہے۔
ان کا کہنا تھا کہ ہماری دعا ہے کہ پاکستان کے چپہ چپہ میں اسی طرح ترقی ہو اور پاکستان کے عوام خوشخال ہوں۔
