22 اگست ، 2023 
بٹگرام: چیئرلفٹ پھنسنے سے متعلق پولیس کی ابتدائی رپورٹ سامنے آگئی
22 اگست ، 2023
خیبر پختونخوا کے شہر بٹگرام میں پاشتو کے مقام پر چیئرلفٹ کی رسی ٹوٹ گئی جس کے نتیجے میں اسکول کے7 بچوں سمیت 8 افراد پھنس گئے جنہیں بچانےکے لیے ریسکیو آپریشن جاری ہے۔
چیئرلفٹ پھنسنے سے متعلق پولیس کی ابتدائی رپورٹ بھی سامنے آگئی ہے۔
پولیس رپورٹ کے مطابق چیئرلفٹ میں7 طالب علم اور ایک مقامی شخص گورنمنٹ ہائی اسکول بٹنگی جانےکے لیے سوار ہوئے، صبح 7:45 بجےکے قریب چیئرلفٹ کا ایک کیبل ٹوٹ گیا،کیبل ٹوٹنے سے چیئرلفٹ بیچ راستے میں فضا میں معلق ہوگئی۔
پولیس رپورٹ میں بتایا گیا ہےکہ چیئرلفٹ زمین سے 900 فٹ کی بلندی پر معلق ہے، چیئر لفٹ میں ابرار، عرفان، اسامہ، رضوان اللہ، عطا اللہ، نیاز محمد ، شیر نواز اورگلفراز سوار ہیں۔
رپورٹ میں بتایا گیا ہےکہ اطلاع ملنے پر ڈپٹی کمشنر بٹ گرام نے کمشنر ہزارہ سے رابطہ کیا، ڈپٹی کمشنر بٹ گرام نے کمشنر ہزارہ سے ہیلی کاپٹر کے انتظام کے لیےکہا، ریسکیو آپریشن کے لیے وادی کاغان میں مقیم ایس ایس جی ٹیم سے بھی رابطہ کیا گیا، آرمی ہیلی کاپٹر صبح 11:45 بجے جائے وقوع پر پہنچ گئے،تقریباً 2 بجے پاک فضائیہ کا ہیلی کاپٹر بھی ریسکیو کے لیے پہنچ گیا۔
پولیس رپورٹ میں کہا گیا ہےکہ ڈسٹرکٹ انتظامیہ، پولیس اور ریسکیو کی دو ٹیمیں جائے وقوع پر موجود ہیں،قریب موجود تمام بنیادی مراکز صحت میں ایمرجنسی نافذ کردی ہے، ڈی ایچ کیو اسپتال بٹ گرام میں بھی ہائی الرٹ کردیا گیا ہے۔
