ورلڈکپ کے دوران ٹیموں کو اسٹیڈیم کس طرح پہنچایا جائیگا؟ بھارت کا سکیورٹی پلان تیار

بھارت میں ہونے والے آئی سی سی کرکٹ ورلڈ کپ کے لیے سکیورٹی اور ٹریفک کا جامع پلان تیار کر لیا گیا ہے۔

بھارتی میڈیا نے سکیورٹی آفیسر کے حوالے سے بتایا ہے کہ اسٹیڈیم تک فینز کی آمد کو آسان بنانے کے انتظامات کیے گئے ہیں اور ٹریفک کی روانی اور پارکنگ کا پلان بھی تیار ہے۔

سکیورٹی آفیسر کے مطابق ورلڈ کپ میچز کے دوران ملٹی لیئر سیکورٹی فراہم کی جائے گی، سکیورٹی ادارے اور مقامی ریاستی کرکٹ ایسوسی ایشن کے ساتھ مکمل رابطے کے لیے کمیونیکیشن سسٹم ترتیب دیا جائے گا۔

ورلڈ کپ میں پاک بھارت میچ، ہوٹل میں کمروں کا حصول تقریباً ناممکن، فضائی کرائے بھی 400 فیصد بڑھ گئے

پاک بھارت میچ میں ابھی تین ہفتے باقی ہیں جس کے باعث فضائی ٹکٹس اور ہوٹل کے کرایوں میں مزید اضافہ متوقع ہے: بھارتی میڈیا

میڈیا رپورٹس میں کہا گیا ہے کہ ہوٹل سے اسٹیڈیم تک ٹیموں کے لیے محفوظ راستہ بنایا جائے گا، پونے سمیت کئی اسٹیڈیمز شہر سے دور واقع ہیں، دوری کی وجہ سے جامع پلان ترتیب دیے جا رہے ہیں۔

کمشنر پولیس وینوئے کمار کا کہنا ہے کہ اسٹیڈیم کے اطراف میں ملٹی لیئر سکیورٹی کا حصار ہو گا، ہر سکیورٹی لیئر کا ایک الگ مقصد ہو گا اور ہر لیئر میں سکیورٹی اہلکاروں کی مخصوص تعداد ہو گی۔

کمشنر پولیس کے مطابق ایک مخصوص ٹیم تشکیل دی گئی ہے جو اسٹیڈیم میں پارکنگ کو دیکھے گی، ہر سکیورٹی لیئر پر فینز کی چیکنگ ہو گی اور میچز سے قبل بھی اسٹیڈیم اور اس کے اطراف میں سکیورٹی چیکنگ ہو گی۔