عمران خان کا 9 مئی سے متعلق 12 مقدمات میں دو روزہ جسمانی ریمانڈ منظور

انسدادِ دہشت گردی عدالت نے پاکستان تحریک انصاف (پی ٹی آئی) کے بانی عمران خان  کا 9 مئی سے متعلق 12 مقدمات میں دو روزہ جسمانی ریمانڈ منظور کرلیا۔

انسدادِ دہشت گردی عدالت کے جج ملک اعجاز آصف نے اڈیالا جیل راولپنڈی میں 9 مئی سے متعلق 12 مقدمات کی سماعت کی۔ 

دوران سماعت بانی پی ٹی آئی کو عدالت میں پیش کیا گیا جبکہ تمام 12 مقدمات کے ایس ایچ اوز ریکارڈ سمیت عدالت میں پیش ہوئے۔ 

پولیس نے بانی پی ٹی آئی کے تیس روزہ جسمانی ریمانڈ کی استدعا کی۔ بانی پی ٹی آئی کے وکلا نے جسمانی ریمانڈ کی مخالفت کی۔ عدالت نے جسمانی ریمانڈ کی استدعا پر فیصلہ محفوظ کرلیا جو بعد میں سناتے ہوئے بانی پی ٹی آئی کا دو روزہ جسمانی ریمانڈ منظور کرلیا۔

سانحہ 9 مئی: عمران خان جی ایچ کیو حملہ کیس میں بھی گرفتار

انسداد دہشتگردی کی عدالت میں کیس کی سماعت کے دوران بانی پی ٹی آئی کو ویڈیو لنک کے ذریعے پیش کیا گیا

عدالت نے پولیس کو بانی پی ٹی آئی سے اڈیالہ جیل میں ہی تفتیش کرنے کا حکم دیا۔ عدالت نے 11 جنوری کو مکمل تفتیشی رپورٹ پیش کرنے کا حکم دیا اور مقدمات کی مزید سماعت 11 جنوری کو صبح دس بجے دوبارہ اڈیالہ جیل ہوگی۔

خیال رہے کہ بانی پی ٹی آئی اس وقت توشہ خانہ اور 190 ملین پاؤنڈز ریفرنسز میں جوڈیشل ریمانڈ پر اڈیالہ جیل میں قید ہیں۔ 

گزشتہ روز بانی پی ٹی آئی کی سائفر کیس میں رہائی کی روبکار جاری کی گئی تھی۔