ماچس کی تیلیوں سے بنا دنیا کا بلند ترین ایفل ٹاور

8 سال کی محنت کے بعد 7 لاکھ سے زائد ماچس کی تیلیوں سے تیار کیے جانے والے ایفل ٹاور نے گنیز ورلڈ ریکارڈ اپنے نام کر لیا ہے۔

فرانس سے تعلق رکھنے والے رچرڈ پلوڈ نے ماچس کی تیلیوں سے 7.2 میٹر بلند ایفل ٹاور تیار کیا تھا۔

اس طرح انہوں نے ماچس کی تیلیوں سے تیار کیے جانے والے بلند ترین اسٹرکچر کا عالمی ریکارڈ اپنے نام کرلیا۔

رچرڈ پلوڈ کے مطابق انہوں نے 8 برسوں کے دوران 4200 گھنٹے کام کیا اور 7 لاکھ 6 ہزار سے زائد ماچس کی تیلیاں استعمال کرکے یہ ٹاور تیار کیا۔

اس ٹاور کی تیاری پر 23 کلوگرام گلیو کا استعمال بھی ہوا۔

انہوں نے مزید بتایا کہ '8 برس تک میں ماچس کی تیلیوں سے تیار ہونے والا بلند ترین ماڈل تیار کرتا رہا'۔

دلچسپ بات یہ ہے کہ گنیز ورلڈ ریکارڈز نے پہلے رچرڈ پلوڈ کو کہا تھا کہ ان کا ٹاور عالمی ریکارڈ حاصل نہیں کر سکتا کیونکہ انہوں نے عام دستیاب تیلیوں کو استعمال نہیں کیا۔

رچرڈ پلوڈ نے پہلے عام تیلیوں کے ساتھ یہ ٹاور تیار کرنا شروع کیا تھا جن کے اوپری سرے کو کاٹنا پڑتا تھا۔

اس چیز سے تنگ آکر انہوں نے کمپنیوں سے سادہ تیلیاں فراہم کرنے کا مطالبہ کیا اور اسی کو دیکھتے ہوئے گنیز کی جانب اسے عالمی ریکارڈز کی کتاب کا حصہ بنانے سے انکار کیا گیا۔

مگر پھر گنیز ورلڈ ریکارڈز نے اپنا ذہن بدل لیا۔

گنیز ورلڈ ریکارڈز کے ڈائریکٹر مارک مکینلے نے بتایا کہ ہم تسلیم کرتے ہیں کہ ہمارا ابتدائی ردعمل کافی سخت تھا، مگر رچرڈ پلوڈ کی کوشش کو اب عالمی ریکارڈ کا درجہ مل گیا ہے۔