بھارتی خاتون کا شوہر کی پسند سے ساڑھی پہننے سے انکار، جوڑا طلاق کیلئے تھانے پہنچ گیا

کیا پہننا ہے اور کیا نہیں؟ مثالی تخیل میں تو یہ انتخاب پہننے والے فرد کا ہونا چاہیے لیکن ازدواجی تعلق میں اگر یہ انتخاب آپ کا شریک حیات کرے تو محبت کا اظہار سمجھا جاتا ہے لیکن بعض تعلقات میں یہی چیز دو افراد کے درمیان کہیں چڑچڑا پن  تو کہیں ناپسندیدگی کی وجہ بن جاتا ہے۔

بھارتی شہر آگرہ میں ایک شادی شدہ جوڑا ساڑھی سے شروع ہوئے جھگڑے پر تھانے پہنچ گیا، جوڑے نے ایک دوسرے کیخلاف ہراسگی کی شکایات درج کرواتے ہوئے طلاق کی درخواست بھی دے ڈالی۔

بھارتی میڈیا کے مطابق آگرہ کے رہائشی دیپک نے تقریباً آٹھ  ماہ قبل اتر پردیش کی ایک  لڑکی سے شادی کی تھی شادی کے بعد  دیپک کی خواہش تھی کہ اس کی بیوی  اس کی پسند کی ساڑھیاں پہنے لیکن وہ اپنی پسند کی ساڑھیاں پہننے پر بضد تھی جس کی وجہ سے ان دونوں کے درمیان آئے روز جھگڑے بڑھتے چلے گئے۔

جوڑے کا جھگڑا جلد ہی فیملی کاؤنسلنگ سینٹرجا پہنچا، جہاں کاؤنسلنگ کے باوجود جوڑا  ساتھ رہنے پر رضامند نہ ہوسکا اور بالآخر  علیحدگی کیلئے پولیس سے رجوع کرلیا۔