وزیراعظم کا چینی صدر کی دعوت پر انکے آبائی شہر میں تاریخی ٹیراکوٹا وارئیر میوزیم کا دورہ

وزیراعظم شہباز شریف نے چین کے صدر شی جن پنگ کی دعوت پر ان کے آبائی شہر میں تاریخی ورثے ٹیراکوٹا وارئیر میوزیم کا دورہ کیا۔

گزشتہ روز ملاقات میں چینی صدر شی جن پنگ نے وزیرِ اعظم کو اپنے آبائی شہر شی آن میں ٹیرا کوٹا وارئیرز میوزیم کا دورہ کرنے کی دعوت دی تھی۔

وزیرِ اعظم نے وفد کے ہمراہ چین کے تاریخی ورثے ٹیراکوٹا وارئیر میوزیم کا دورہ کیا۔ دورے میں وزیرِ اعظم اور پاکستانی وفد کو تاریخی ورثہ جات کے تحفظ و بحالی اور سیاحت کے فروغ کے حوالے سے بریفنگ دی گئی۔

وزیرِ اعظم نے میوزیم کے مختلف حصوں کا دورہ کیا اور قدیم چینی تاریخی ورثے کی خوبصورتی اور چینی ہنر کی تعریف کی۔ اس موقع پر شہباز شریف کا کہنا تھاکہ عظیم قومیں چین کی طرح اپنے تاریخی ورثے کی حفاظت کرتی ہیں، چین نے محنت سے دنیا کے ہر شعبے میں اپنا لوہا منوایا ہے۔

وزیراعظم کی چینی صدر سے طویل ملاقات، سی پیک کی اپ گریڈیشن پر اتفاق

صدرشی جن پنگ نے وزیراعظم کے اعزاز میں عشائیے کا بھی اہتمام کیا اور عشائیے میں بھی باہمی دلچسپی کے امور پر بات چیت کا ایک اور دور ہوا

ان کا کہنا تھاکہ شی جن پنگ کی اس میوزیم کے دورے کی دعوت پر ان کا بے حد مشکور ہوں، پاکستان تاریخی و ثقافتی ورثے سے مالامال ہے، پاکستان میں بھی ایسی تاریخی جگہوں کی بحالی کے بعد انہیں سیاحتی مقامات میں تبدیل کریں گے۔

دوسری جانب وزیرِ اعظم شہباز شریف اپنا پانچ روزہ دورہ چین مکمل کرکے پاکستان روانہ ہوگئے۔ وزیراعظم کو شانشی صوبے کے نائب گورنر، اعلیٰ چینی و پاکستانی سفارتی اہلکاروں نے رخصت کیا۔