اسلام آباد … نادرا نے غیرقانونی سمز کی روک تھام کا نظام شفاف بنانے کیلئے بائیو میٹرک سسٹم تیار کرلیا، ذرائع کا کہنا ہے کہ تمام موبائل کمپنیاں سم اجراء کیلئے بائیو میٹرک سسٹم 28 فروری تک لگانے کی پابند ہیں۔ سرکاری ذرائع نے جیونیوز کے نمائندے آصف علی بھٹی کو بتایا ہے کہ حکومت پاکستان کی ہدایت پر نادرا نے موجودہ موبائل فون سمز کے اجراء اور پہلے سے موجود سمز کی ویری فکیشن کا نیا اور جدید بائیو میٹرک سسٹم کا ماڈل تیار کرلیاہے، اس سسٹم کے بارے میں نادرا حکام نے باقاعدہ طور پر موبائل فون کمپنیوں اور دیگر اسٹیک ہولڈرز کو بریفنگ دے دی ہے اور اس سسٹم کا ماڈل تمام کمپنیوں کو بھجوادیا گیا ہے۔ ذرائع کا کہنا ہے کہ بائیو میٹرک سسٹم کی مدد سے سمز کا دہشت گردی اور غیرقانونی کارروائیوں میں استعمال روکا جاسکے گا۔ ذرائع نے انکشاف کیا ہے کہ حکومت پاکستان کی ہدایت پر پی ٹی اے تمام موبائل کمپنیاں 28 فروری تک بائیو میٹرک سسٹم لگانے بھی ہدایات جاری کردی ہیں اور واضح کیا ہے کہ تمام کمپنیاں نیا سسٹم لگانے کی پابند ہیں۔ ذرائع کا کہنا ہے کہ نیا سسٹم کمپنیاں اپنی فرنچائز اور ڈسٹری بیوشن سینٹرز پر نصب کریں گی جبکہ ان کے ہیڈ کوارٹرز میں سنٹرل مانیٹرنگ سسٹم بھی لگایاجائیگا۔