16 جولائی ، 2024 
محکمہ داخلہ کی ہدایات نظر انداز، کے الیکٹرک کی جانب سے بجلی کی بندش کا سلسلہ جاری
16 جولائی ، 2024
کے الیکٹرک نے محکمہ داخلہ کی ہدایات کو نظر انداز کرتے ہوئے شہر کے مختلف علاقوں میں محرم الحرام کی چھٹیوں کے باوجود اعلانیہ اور غیر اعلانیہ لوڈشیڈنگ کا سلسلہ جاری رکھا ہوا ہے۔
محکمہ داخلہ سندھ نے ہدایت کی ہےکہ صوبے میں محرم الحرام کے دوران بلا تعطل بجلی فراہم کی جائے، محرم الحرام میں بجلی کی معطلی کے باعث سکیورٹی رسک پیدا ہونے کے خدشات ہیں۔
محکمہ داخلہ سندھ نے ہدایت کی ہے کہ مذہبی اجتماعات کے پیش نظر بلا تعطل بجلی کی سپلائی جاری رکھی جائے۔
محکمہ داخلہ کی ہدایات کے باوجود کے الیکٹرک کی جانب سے شہر میں اعلانیہ اور غیر اعلانیہ لوڈشیڈنگ کا سلسلہ جاری ہے۔
علاقہ مکینوں کے مطابق فیڈرل بی ایریا کے مختلف بلاکس، ناظم آباد، لیاقت آباد سی ون ایریا، سٹی ریلوے کالونی، اللہ والا ٹاؤن، پی آئی بی کالونی میں بجلی کی لوڈ شیڈنگ جاری ہے جب کہ طویل لوڈ شیڈنگ کے باعث پانی کی قلت کا بھی سامنا ہے۔
