24 اگست ، 2024 
عمران خان جیل میں رہنے کے عادی ہو چکے ہیں: ذاتی معالج کا طبی معائنے کے بعد بیان
24 اگست ، 2024
پاکستان تحریک انصاف کے بانی اور سابق وزیراعظم عمران خان کے ذاتی معالج ڈاکٹر عاصم یوسف نے کہا ہے کہ عمران خان کا جیل میں مورال کافی بلند ہے، وہ جیل میں رہنے کے عادی ہو چکے ہیں۔
اڈیالہ جیل میں شوکت خانم اسپتال کے ڈاکٹروں نے عمران خان کا طبی معائنہ کیا۔ ذرائع کا کہنا ہے کہ سرکاری ڈاکٹر نے طبی معائنے کے بعد بانی پی ٹی آئی کو دوا تجویز کی تھی لیکن بانی پی ٹی آئی کے اپنے معالج نے سرکاری ڈاکٹر کی دوا لینے سے روک دیا تھا۔
بانی پی ٹی آئی کے وکلا کی درخواست پر عدالت نے بانی پی ٹی آئی کا طبی معائنہ کرکے رپورٹ جمع کرانے کا حکم دے رکھا ہے۔
دوسری جانب عمران خان کے ذاتی معالج ڈاکٹر عاصم یوسف نے طبی معائنے کے بعد ویڈیو بیان جاری کیا ہے۔
ویڈیو بیان میں ڈاکٹر عاصم یوسف کا کہنا تھاکہ بانی تحریک انصاف تندرست اور متحرک ہیں، جیل میں ان کی صحت کافی اچھی ہے اور انہیں جیل میں کھانے پینے کی کوئی تکلیف نہیں، ان کا پیٹ ٹھیک ہے۔
انہوں نے کہا کہ بانی پی ٹی آئی کی دل کی دھڑکن اوربلڈ پریشر بھی معمول کے مطابق ہے، ان کا جیل میں مورال کافی بلند ہے، وہ جیل میں رہنے کے عادی ہو چکے ہیں، بانی پی ٹی آئی جیل میں ایکسرسائز بھی کرتے اور کتابیں پڑھ رہے ہیں۔
ڈاکٹرعاصم کا کہنا تھاکہ مجھے یا ڈاکٹر فیصل سلطان کو ہر دو ہفتے بعد بانی پی ٹی آئی کے چیک اپ کی اجازت ملنی چاہیے، ان کے فالو اپ چیک اپ بہت ضروری ہیں۔
