ناراض بیوی کو منانے کے لیے 4400 کلومیٹر تک سائیکل پر سفر کرنے والا شوہر

اگر بیوی ناراض ہو جائے تو اسے منانے کے لیے شوہر کیا کچھ کرسکتے ہیں؟

چین میں ایک شخص نے ناراض بیوی کو منانے کے لیے ایسے طریقے کا انتخاب کیا، جو دنگ کردینے والا ہے۔

اس شخص نے ناراض بیوی کو منانے کے لیے 100 دنوں میں 4400 کلومیٹر کے فاصلے تک سائیکل چلائی۔

صوبہ جیانگسو سے تعلق رکھنے والے زاؤ نے لی نامی خاتون سے 2007 میں شادی کی تھی۔

مگر 2 سال قبل ذاتی اختلافات کے باعث ان کی بیوی الگ ہوکر رہنے لگی۔

زاؤ کے مطابق 'ہم دونوں کے درمیان کوئی زیادہ سنجیدہ مسئلہ نہیں تھا، بس ہم دونوں نے ضد پکڑلی اور الگ ہوگئے، مگر ہم دونوں رابطے میں رہے تاکہ دوبارہ اکٹھے ہوسکیں'۔

زاؤ کی بیوی لی نے اس حوالے سے بتایا کہ 'وہ چاہتا تھا کہ ہم ایک بار اکٹھے ہو جائیں اور میں نے مذاق میں کہا کہ اسے لہاسا تک جانا ہوگا، اگر وہ سائیکل پر وہاں تک جاتا ہے تو میں صلح کرلوں گی'۔

انہوں نے بتایا کہ 'صحیح بات تو یہ ہے کہ میں نے یہ سب ایسے ہی کہا تھا، مگر مجھے توقع نہیں تھی کہ وہ حقیقت میں ایسا کرے گا'۔

زاؤ نے اپنے سفر کا آغاز 28 جولائی کو Nanjing شہر سے کیا اور 100 سے زائد دنوں تک سائیکل پر 4400 کلومیٹر کا فاصلہ طے کرکے 28 اکتوبر کو لہاسا پہنچنے میں کامیاب ہوا۔

اس سفر کے دوران اسے 2 بار ہیٹ اسٹروک کا سامنا ہوا۔

دوسری بار زاؤ کے بیمار ہونے پر ان کی اہلیہ بھی اسپتال پہنچی اور سفر ملتوی کرنے پر زور دیا۔

مگر زاؤ نے انکار کردیا کیونکہ وہ سفر مکمل کرکے اپنا عزم ظاہر کرنا چاہتا تھا۔

زاؤ کی صحتیابی کے بعد ان کی اہلیہ بھی اس سفر میں شامل ہوگئیں اور وہ دونوں اکٹھے 28 اکتوبر کو لہاسا پہنچے، جہاں ایک تقریب میں صلح کا اعلان کیا۔

زاؤ اب نیپال اور یورپ تک سائیکل سے سفر کرنے کی منصوبہ بندی کر رہا ہے۔