05 دسمبر ، 2024 
کراچی ڈاؤن سنڈروم پروگرام کے بچوں کا وزیراعلیٰ ہاؤس کا دورہ
05 دسمبر ، 2024
کراچی ڈاؤن سنڈروم پروگرام کے 22 بچوں نے وزیراعلیٰ ہاؤس کا دورہ کیا، بچوں نے مختلف دفاتر دیکھے اور وزیراعلیٰ کی کرسی پر بھی باری باری بیٹھے۔
ترجمان وزیراعلیٰ ہاؤس کے مطابق وزیراعلیٰ سندھ مراد علی شاہ نے ڈاؤن سنڈروم کے شکار بچوں کا استقبال کیا۔
بچوں نے وزیر اعلیٰ ہاؤس کے مختلف دفاتر کا دور کیا، وزیراعلیٰ سندھ نے بچوں سے گفتگو کی اور کہا کہ وزیر اعلیٰ ہاؤس 100 سال سے زیادہ پرانی عمارت ہے، وزیراعلیٰ نے بچوں سے پوچھا کہ آپ میں سے کون وزیراعلیٰ بنےگا؟
زیادہ تر بچوں نے وزیراعلیٰ سندھ سید مراد علی شاہ کو کہا کہ وہ چیف منسٹر بننا چاہتے ہیں۔
تمام بچوں کی خواہش کا احترام کرتے ہوئے وزیراعلیٰ سندھ تمام بچوں کو اپنے دفتر لے گئے اور باری باری ہر بچے کو وزیراعلیٰ کی کرسی پر بٹھایا اور بچوں کے ساتھ بھرپور وقت گزارا۔
وزیراعلیٰ سندھ نے بچوں کے ساتھ تصاویر بنوائی، انہیں تحائف دیے اور سی ایم ہاؤس آمد پر ان کا شکریہ ادا کیا۔
