27 دسمبر ، 2024 
اسٹیبلشمنٹ سے کئی بار مذاکرات ہوئے، اسٹیبلشمنٹ مذاکراتی ٹیم کو فیسلیٹیٹ بھی کررہی ہے: شیر افضل
27 دسمبر ، 2024
پاکستان تحریک انصاف کے رہنما شیر افضل مروت نے کہا ہے کہ اسٹیبلشمنٹ کے ساتھ ہمارے کئی بار مذاکرات ہوئے، اسٹیبلشمنٹ مذاکراتی ٹیم کو فیسلیٹیٹ بھی کررہی ہے۔
جیو نیوز کے پروگرام’آج شاہ زیب خانزادہ کے ساتھ‘میں گفتگو کرتے ہوئے شیر افضل مروت کا کہنا تھاکہ سیاسی دہشت گردی کیاہوتی ہے؟ 26 نومبر کو ہمیں مارا گیا، 26 نومبر کو کیاہوا سب جانتے ہیں، ہمیں سیاسی دہشت گرد قرار دیا جارہاہے، موجودہ وقت ایسے بیانات کا نہیں تھا۔
انہوں نے کہا کہ پی ٹی آئی میں بہت سارے عناصر ہیں جو نہیں چاہتے کہ توپوں کا رخ اداروں کی طرف ہو، ہماری کوشش ہے کہ اداروں کو سیاست کی نظر سے نہ دیکھا جا ئے۔
ان کا کہنا تھاکہ مذاکرات کا عمل خوش آئند ہے، میں نہیں سمجھتا کہ ان بیانات سے مذاکرات پر کوئی اثر پڑنا چاہیے، باہر بیٹھے بعض لوگ ذمہ دارانہ بیانات دیتے ہیں، بہت سے لوگ پی ٹی آئی کی صف میں شامل ہوکر گالم گلوچ کرتے ہیں اور بانی پی ٹی آئی ایسے عناصر سے لاتعلقی کا اظہار کرچکے۔
شیر افضل مروت کا کہنا تھاکہ ان لوگوں کے بیانات کی قیمت پاکستان میں موجود پی ٹی آئی کےلوگوں کو چکانی پڑتی ہے۔
پی ٹی آئی رہنما نے کہا کہ چیزیں مثبت انداز میں آگے بڑھ رہی ہیں، ہوش کے ناخن نہ لیے، معیشت کو درست سمت گامزن نہ کیا تو سب اکٹھے کھائی میں گریں گے۔
انہوں نے کہا کہ اسٹیبلشمنٹ کے ساتھ ہمارے کئی بار مذاکرات ہوئے، اسٹیبلشمنٹ مذاکراتی ٹیم کو فیسلیٹیٹ بھی کررہی ہے، مذاکرات کے معاملے پر بانی پی ٹی آئی بہت مثبت ہیں۔
