01 فروری ، 2025 
مستعفی ایڈیشنل ایڈووکیٹ جنرل پختونخوا کو جوڈیشل کمیشن کے پی ٹی آئی ارکان نے بھی ووٹ نہ دیا
01 فروری ، 2025
خیبر پختونخوا کے مستعفی ایڈیشنل ایڈووکیٹ جنرل سید کوثر علی شاہ کو ججز تقرری کیلئے جوڈیشل کمیشن اجلاس میں پاکستان تحریک انصاف کے ارکان نے بھی ووٹ نہ دیا۔
جوڈیشل کمیشن نے پشاور ہائیکورٹ کیلئے 10 ایڈیشنل ججز کی منظوری دے دی۔ اعلامیے کے مطابق محمد طارق آفریدی، عبدالفیاض، سیشن جج فرح جمشید، سیشن جج انعام اللہ خان، ثابت اللہ خان، صلاح الدین، ثاقب علی، سید مدثر امیر، اورنگزیب اور قاضی جواد احسان اللہ کے ناموں کی منظوری دی گئی ہے۔
ذرائع نے بتایاکہ جوڈیشل کمیشن اجلاس میں 9 ایڈیشنل ججز کی تعیناتیوں کا ایجنڈا زیرغورتھا لیکن اجلاس کے دوران چیف جسٹس پشاورہائیکورٹ نے 10 ایڈیشنل ججزکامطالبہ کیا اور چیف جسٹس پاکستان نے چیف جسٹس پشاور ہائیکورٹ کی رائے سےاتفاق کیا۔
ذرائع کے مطابق پشاور ہائی کورٹ کیلئے 10ایڈیشنل ججز کی تعیناتیاں اکثریت سے ہوئیں۔
سید کوثر علی شاہ کا نام پشاور ہائیکورٹ کے ایڈیشنل ججز کیلئے فہرست میں شامل تھا تاہم کوثر علی شاہ کو ایڈیشنل جج نامزد نہیں کیا گیا۔
ذرائع کے مطابق مستعفی ایڈیشنل ایڈووکیٹ جنرل سیدکوثرحسین شاہ کو کمیشن میں کوئی ووٹ نہیں ملا، جوڈیشل کمیشن کے پی ٹی آئی ارکان نے بھی انہیں ووٹ نہ دیا۔
دوسری جانب پشاور ہائیکورٹ کا ایڈیشنل جج نامز نہ ہونے پر ایڈیشنل ایڈووکیٹ جنرل سیدکوثرحسین شاہ مستعفی ہوگئے اور اپنے استعفے میں کہا کہ جوڈیشل کمیشن میں مجھ سے امتیازی سلوک برتا گیا۔
مستعفی ایڈیشنل ایڈووکیٹ جنرل کے پی نے اپنے استعفے میں لکھا کہ کمیشن میں کہا گیا دستاویزات میں پی ٹی آئی کی بنیادی رکنیت چھوڑنےکا حلف نامہ شامل نہیں۔
