03 مارچ ، 2025 
شہدا پیکج اور تنخواہ نہ ملنے پر شہید پولیس اہلکار کی بیوہ نے آئی جی کے پی کو خط لکھ دیا
03 مارچ ، 2025
پشاور: لکی مروت کے شہید پولیس اہلکار عبدالرحمان کی بیوہ ناہید بی بی نے آئی جی خیبر پختونخوا کو خط ارسال کیا ہے جس میں اپنے معاشی مسائل کا تذکرہ کیا ہے۔
خط میں ناہید بی بی نےکہا ہےکہ ان کی 9 بچیاں اور ایک بیٹا ہے، شوہر کو ستمبر 2024 میں مسجد سے نکلتے وقت دہشت گردوں نے شہید کیا تھا، وہ تھانہ صدر بنوں میں تعینات تھے اور ان کی شہادت کو 6 ماہ گزر چکے ہیں لیکن تاحال نہ تنخواہ ملی ہے اور نہ ہی شہدا پیکج ملا۔
خاتون کے مطابق وہ قرض لےکر اور مختلف دفاتر کے چکر لگا کر تھک چکی ہیں مگر اب تک کوئی شنوائی نہیں ہوئی، صورتحال اتنی خراب ہو چکی ہےکہ ان کے بچے فاقہ کشی پر مجبور ہیں اور بھیک مانگنے پر آگئے ہیں۔
آئی جی خیبر پختونخوا ذولفقار حمید نے اس کیس سے متعلق جیو نیوز کو بتایا کہ کیس مکمل کرکے صوبائی حکومت کو بھجوا دیا ہے، محکمہ داخلہ نے بھی اسے محکمہ خزانہ کو ارسال کر دیا ہے لیکن تاحال وہاں سے فنڈز جاری نہیں کیےگئے۔
آئی جی کے مطابق شہدا پیکجز محکمہ خزانہ خیبر پختونخوا کے پاس زیر التوا ہیں، جس کی وجہ سے متاثرہ خاندانوں کو مشکلات کا سامنا ہے۔
