اسلام آباد… وفاقی کابینہ کی حلف برداری آج سہ پہر ایوان صدر میں ہوگی، صدر زرداری وزرا سے حلف لیں گے۔ ذرائع کے مطابق وزیر اعظم میاں نواز شریف کی طرف سے جن وفاقی وزارتوں کے قلمدانوں کو حتمی شکل دی گئی ہے اور متعلقہ وزراء کو بھی آگاہ کیا جا چکا ہے ان میں سینیٹر اسحاق ڈار وفاقی وزیر خزانہ اور چوہدری نثار وزیر داخلہ ہوں گے۔ ذرائع کے مطابق خواجہ آصف وفاقی وزیر پانی و بجلی، شاہد خاقان عباسی وزیر پٹرولیم و قدرتی وسائل ، پرویز رشید وفاقی وزیر اطلات و نشریات اور طارق فاطمی وزارت خارجہ کے مشیر کا قلمدان سنبھالیں گے۔ کابینہ کا حصہ بننے والے دیگر متوقع وفاقی وزراء اپنی وزارتوں کے بارے میں جاننے کے لیے تا حال ہاتھ پاوٴں مار رہے ہیں۔ انہی میں سے ایک متوقع وزیر نے جیو نیوز کے رابطہ کرنے پربتایا کہ اس بار وزیر اعظم میاں نواز شریف نے پارٹی کے سینئر رہنماوٴں سے بھی روایتی مشاورت نہیں کی اور وزارتوں کے قلمدانوں کا فیصلہ کسی کی پسند نا پسند کی بجائے خود کیا ہے۔ متوقع وفاقی وزراء میں زاہد حامد، احسن اقبال، خواجہ سعد رفیق، رانا تنویر، راجہ ظفر الحق، خرم دستگیر، بلیغ الرحمان، سردار یوسف، کامران مائیکل، عبد القادر بلوچ، سائرہ افضل تارڑ، مسلم لیگ ف کے صدر الدین راشدی اور نیشنل پیپلز پارٹی کے غلام مرتضیٰ جتوئی شامل ہیں۔ وفاقی کابینہ کے ارکان سے صدر آصف زرادری حلف لیں گے جبکہ وزیر اعظم میاں نوازز شریف بھی اس موقع پرموجود ہوں گے۔